Հայաստանը միացել է Եվրոպայի խորհրդի՝ «Կանանց նկատմամբ բռնության և ընտանեկան բռնության կանխարգելման և դրա դեմ պայքարի մասին կոնվենցիային» (Ստամբուլի կոնվենցիա): Փաստաթուղթը ստորագրել է Եվրախորհրդում Հայաստանի մշտական ներկայացուցիչ Պարույր Հովհաննիսյանը: Արարողությանը ներկա է եղել Եվրախորհրդի գլխավոր քարտուղարի տեղակալ Գաբրիելլա Բատաինի-Դրագոնին:
Այդպիսով, Հայաստանը դարձավ Եվրախորհրդի 45-րդ անդամը, որը ստորագրել է այդ կոնվենցիան: Եվրախորհրդի 47 երկրներից նշված կոնվենցիան չեն ստորագրել միայն Ադրբեջանը և Ռուսաստանը:
Ստամբուլի կոնվենցիան նպատակ ունի պաշտպանել կանանց բռնության բոլոր ձևերից և կանխարգելել, հետապնդել և վերացնել կանանց նկատմամբ բռնությունն ու ընտանեկան բռնությունը, նպաստել կանանց նկատմամբ խտրականության բոլոր ձևերի վերացմանն ու խթանել կանանց և տղամարդկանց միջև իրական հավասարությունը, այդ թվում՝ կանանց ազատականացման միջոցով։
Պատրաստեց՝ Վիկտորյա ԱՆԴՐԵԱՍՅԱՆԸ
