2018 թ. հունվարի 18-ին ՀՀ Վերաքննիչ վարչական դատարանում սկսվեց ցուցարար Վարդան Բալյանի և նրա ներկայացուցիչ, ՀՔԱ Վանաձորի գրասենյակի Երևանի ներկայացուցչության իրավաբան Տ. Սիրադեղյանի վերաքննիչ բողոքի քննությունը: Վարդան Բալյանը 2016 թ. մարտի 24-ին Գևորգ Սաֆարյանի կալանքի ժամկետը երկարաձգելու վերաբերյալ միջնորդության քննարկմանն ընդառաջ կազմակերպված հավաքի մասնակից է:
ՀՀ Վարչական դատարան ներկայացված հայցով ՀՀ Ոստիկանությունը պահանջել էր նրան վարչական պատասխանատվության ենթարկել ՀՀ Վարչական իրավախախտումների վերաբերյալ օրենսգրքի 180.1 հոդվածի 11-րդ և 15-րդ կետերի պահանջներով: 2016 թ. նոյեմբերի 28-ին դատարանը հայցը բավարարել էր մասնակի, և ցուցարարին տուգանել 70.000 ՀՀ դրամով: Ցուցարարն ու նրա ներկայացուցիչը պահանջում են բեկանել վարչական դատարանի ակտը և կայացնել նոր դատական ակտ՝ մերժելով ՀՀ Վարչական իրավախախտումների վերաբերյալ օրենսգրքի 180.1 հոդվածի 15-րդ կետով վարչական պատասխանատվության ենթարկելու պահանջով հայցը: Ներկայացված բողոքում նրանք հիմնավորումներ են ներկայացրել այն մասին, որ ՀՀ Վարչական իրավախախտումների վերաբերյալ օրենսգրքի 180.1 հոդվածի 15-րդ կետով նախատեսված զանցանքի կատարման վերաբերյալ ապացույցներ վարչական դատարանում ձեռք չեն բերվել:
Գործի քննության ընթացքում ձեռք բերված ապացույցները բավարար չեն փաստելու, որ ոստիկանության ներկայացուցիչները Վ. Բալյանին պահանջ են ներկայացրել, առավել ևս, որ այդ պահանջը ներկայացվել է սահմանված կարգով։ Ընդ որում, վարչական դատարանը փաստել է, որ ցուցարարը հավաքի բնականոն ընթացքը խոչընդոտելու վարքագիծ չի դրսևորվել, հետևաբար՝ դրանից հրաժարվելու պահանջ չէր կարող ներկայացվել նրան: ՀՀ Վարչական վերաքննիչ դատարանում ՀՀ Ոստիկանության ներկայացուցիչ Ս. Մելիքյանը առարկեց բողոքի դեմ՝ նշելով, որ ՀՀ Վարչական դատարանի որոշմամբ հիմնավորվել է իրավախախտման փաստը: Այսպիսով՝ բողոքի քննությունն ավարտվեց: ՀՀ Վարչական վերաքննիչ դատարանի որոշումը կհրապարակվի 2018 թ․ փետրվարի 7-ին՝ ժամը 16։00-ին։
Հելսինկյան Քաղաքացիական Ասամբլեայի Վանաձորի գրասենյակ
