Human Rights Watch իրավապաշտպան կազմակերպությունը հրապարակել է իր տարեկան զեկույցը, որում անդրադարձ է կատարվում Հայաստանում մարդու իրավունքների ոլորտում առկա խնդիրներին:
Զեկույցում, մասնավորապես, նշվում է, որ 2016թ. ապրիլին Հայաստանում անցկացված խորհրդարանական ընտրությունները չկարողացան բարձրացնել հանրային վստահությունը ընտրական համակարգի նկատմամբ:
«Հայաստանի իշխող կուսակցությունը գերակշռող ձայներ է ստացել 2017թ. խորհրդարանական և ավագանու ընտրություններում: Միջազգային փորձագետները եզրակացրել են, որ ապրիլին տեղի ունեցած խորհրդարանական ընտրությունները «լավ կազմակերպված էին», բայց «ստվերվեցին ընտրակաշառքների և քաղծառայողների ու մասնավոր ընկերությունների աշխատողների վրա ճնշումների մասին արժանահավատ տեղեկություններով»»,- ասվում է զեկույցում:
Իշխանություններին չի հաջողվել նաև հաշվետվողականություն ապահովել այն պաշտոնյաների նկատմամբ, որոնք պատասխանատու էին 2016թ. հուլիսին Երևանում տեղի ունեցած հիմնականում խաղաղ ցույցերի ժամանակ ցուցարարների և լրագրողների նկատմամբ անհամաչափ ուժի կիրառման մեջ: Որոշ ոստիկաններ կարգապահական տույժի են ենթարկվել, բայց ոչ մեկը քրեական պատասխանատվության չի ենթարկվել:
Միաժամանակ, իշխանությունները մեղադրանքներ են ներկայացրել ցույցի մասնակիցների նկատմամբ. նրանցից առնվազն 22-ը մեղադրվում են զանգվածային անկարգությունների ժամանակ բռնություն գործադրելու մեջ:
Իշխանություններին նաև չի հաջողվել արդյունավետ քննություն անցկացնել՝ կապված հունիսին Երևանի բանտում նշված գործով մեղադրվող 4 անձի ծեծի ենթարկելու հետ: Նրանց ծեծի ենթարկող ոստիկաններից մի քանիսը շարունակել են հերթապահությունը դատարանի դահլիճում:
Զեկույցում նաև նշվում է, որ Հայաստանում հազարավոր երեխաներ շարունակում են մնալ գիշերօթիկ դպրոցներում հաշմանդամության կամ աղքատության պատճառով: Չնայած իշխանությունները այդ հաստատությունների մի մասը վերափոխել են համայնքային կենտրոնների, բայց այդ գործընթացը չի ներառել հաշմանդամություն ունեցող երեխաների բոլոր հաստատությունները: Հաշմանդամություն ունեցող երեխաները հաճախ մնում են հաստատություններում որպես չափահաս, անորոշ ժամկետով, ասվում է զեկույցում:
Պատրաստեց Վիկտորյա ԱՆԴՐԵԱՍՅԱՆԸ
