«Պրոբացիայի ծառայության ներդրման վերջնական նպատակը կրկնահանցագործության ռիսկի նվազեցումն է»,- այսօր լրագրողների հետ հանդիպման ժամանակ Պրոբացիոն ծառայության մեկուկես տարվա աշխատանքն ամփոփելիս ասաց ՀՀ արդարադատության փոխնախարար Սուրեն Քրմոյանը:
ՀՀ պրոբացիայի պետական ծառայության պետ Արսեն Նավասարդյանն էլ նկատեց, որ փորձում են նախ հասկանալ շահառուի խնդիրները եւ դրա վրա թիրախավորված աշխատել: Օրինակ, եթե անձն ունի կրթության խնդիրներ, ուղղորդում են կրթական խնդիրները լուծելու համար պատասխանատու մարմնին. «Այդ ընթացքում մենք իրականացնում ենք վերահսկողություն՝ փորձելով նրանց հետ բերել դեպի հասարակություն: Այն, որ անձը պիտակավորվում է, որ դատապարտյալ է, իր համար մեր հասարակությունում դեռևս բարդություն առաջացնում է, բայց երբ մենք ենք ուղղորդում զբաղվածության կենտրոններ, փորձում ենք բացատրել, որ նրանք պետք է աշխատանք գտնեն և կարողանան վերաինտեգրվել հասարակությունում»:
Պարոն Նավասարդյանի տվյալներով, փորձնական ներդրված պրոբացիոն ծառայությունը Հայաստանում ունի 3090 շահառու, նրանք ոչ մեծ և միջին հանցագործություններ կատարած անձինք են. «Մեկուկես տարի առաջ մենք առաջին անգամ փորձարկեցինք պրոբացիայի ծառայությունը: Այս ծառայության փորձարկմամբ ՀՀ կառավարությունն ամրագրեց և հաստատեց վերականգնողական արդարադատության համակարգերի ներդրումը, սա նշանակում է, որ պատժի նպատակներին մենք ակնկալում ենք հասնել ոչ միայն անձին ազատազրկման մեջ պահելով, այլև նրան վերասոցիալականացնելով ու պատիժն իրականացնելով՝ առանց ազատությունից զրկելու»:
Սուրեն Քրմոյանն էլ հավելեց. «Փորձելու ենք պայմանական վաղաժամկետ ազատման ինստիտուտը դարձնել ավելի պրոֆեսիոնալ: Հուսով եմ, որ մենք կհասնենք նրան, որ շահառուների շրջանում կրկնահանցագործության ռիսկը էապես կնվազի»:
Արփինե ՍԻՄՈՆՅԱՆ
