Ադրբեջանի ԱԳ նախարար Էլմար Մամեդյարովը հունվարի 16-ին Ֆրանսիա կատարած այցի շրջանակում հանդիպել է այդ երկրի արտգործնախարար Ժան-Իվ Լե Դրիանի հետ։
Կողմերը գոհունակություն են հայտնել երկկողմ հարաբերությունների զարգացման կապակցությամբ և ընդգծել են քաղաքական կապերի հետագա խորացման համար բարձր մակարդակով հանդիպումների կարևորությունը, հայտնում է ադրբեջանական minval.az գործակալությունը՝ վկայակոչելով Ադրբեջանի ԱԳՆ մամուլի ծառայությունը։
Հանդիպման ընթացքում անդրադառնալով ղարաբաղյան հակամարտությանը՝
Մամեդյարովը հավաստիացրել է, որ Ադրբեջանը «էական, ակտիվ, տրամաբանական բանակցությունների կողմնակից է՝ հանուն հակամարտության արագ փուլային կարգավորման, և որ ԵԱՀԿ Մինսկի խմբի համանախագահների հետ կգործադրի բոլոր ջանքերն այդ ուղղությամբ»։
Հանդիպման ընթացքում քննարկվել են նաև տնտեսական, հումանիտար ոլորտներում համագործակցության և միջազգային օրակարգի այլ հարցեր։
Պատրաստեց Վիկտորյա ԱՆԴՐԵԱՍՅԱՆԸ
