Շենգավիթ վարչական շրջանի ընդհանուր իրավասության դատարանում այսօր «Սասնա ծռերի» գործով դատական նիստը սկսեց ուշացումով ու հետաձգվեց քառասուն րոպեով: Դատարան չէին ներկայացել ոչ ամբաստանյալները, ոչ նրանց պաշտպանները: Հիշեցնենք, որ դեռ նախորդ նիստին ամբաստանյալները հայտարարել էին, որ ի պաշտպանություն իրենց՝ հացադուլ սկսած ընկերների բոյկոտելու են նիստերը ու չեն ներկայանալու, բացի այդ հրաժարվել էին իրենց պաշտպանների փաստաբանական ծառայություններից:
Փաստաբաններն այսօր դատարան եկել էին, բայց նիստերի դահլիճ չմտան, այլ նախագահող դատավորին դիմում գրեցին՝ իրենց չներկայանալու մասին:
«Իմ այսօրվա նիստին ներկայանալու միակ պատճառն այն էր, որ դատարանից ծանուցագիր էի ստացել: Այդ էր պատճառը, որ ներկայացա, բայց նշանակված ժամին նիստը չէր սկսել, ինչի համար իմ գործընկերների հետ դիմում գրեցինք՝ նշելով, որ դատական նիստին մեզ հրավիրելու պատճառը մեզ համար անհայտ է, քանի որ մեր պաշտպանյալները հայտարարել են մեզանից հրաժարվել են, եւ մենք հեռանում ենք»,- նիստի ընդմիջման ժամանակ ասաց փաստաբան Մուշեղ Շուշանյանը:
Արփինե ՍԻՄՈՆՅԱՆ
