Ըստ սոցիոլոգ Ահարոն Ադիբեկյանի` հանցագործությունների թվի աճը պայմանավորված է սոցիալտնտեսական իրավիճակով, ինչքան վատանում է մարդկանց սոցիալական վիճակն, այնքան մեծանում է հանցագործությունների թիվը:
«Եթե մի տասը տարի առաջ ասեին, որ տրանսպորտում գողեր կան, կզարմանայինք, հիմա տրանսպորտային գողությունն է շատացել, խանութներում կատարվող գողության դեպքերն են շատացել: Փողոցներում կատարվող գողությունն էլ պետք է որ աճի: Նույն խանութներում շատ բան է տեղի ունենում, որ խանութի ղեկավարները չեն հայտնում, ուղղակի աշխատող են ազատում աշխատանքից: Մենք շատ բան չգիտենք, իրականում հանցագործություններն ավելի լայն թվաքանակ են կազմում: Եթե վաճառողն ամեն օր 300 գրամ երշիկ է գողանում, տանում տուն, այդ գողությունն ով է ֆիքսում, բայց դա գողություն է: Տնտեսական վիճակի, գործազրկության կտրուկ աճը բերում է կենցաղային հանցագործությունների աճ »,- Aravot.am-ի հետ զրույցում ասաց Ահարոն Ադիբեկյանը:
Հիշեցնենք, որ Հանրապետության նախագահի հետ աշխատանքային հանդիպման ժամանակ գլխավոր դատախազ Արթուր Դավթյանը ներկայացրել է 2017թ. ընթացքում հանրապետությունում ընդհանուր հանցավորության և հանցագործությունների բացահայտման դինամիկային՝ նշելով, որ ծանր և առանձնապես ծանր հանցագործությունների մասով էական նվազում է արձանագրվել հանրային մեծ վտանգավորություն ունեցող այնպիսի հանցատեսակներով, ինչպիսիք են սպանությունը, սպանության փորձը, առողջությանը դիտավորությամբ ծանր վնաս պատճառելը, ավազակությունը, բնակարանային գողությունը, բայց ծանր և առանձնապես ծանր հանցագործությունների նվազման պայմաններում հանցագործությունների ընդհանուր թվի աճ է արձանագրվել:
Արփինե ՍԻՄՈՆՅԱՆ
