Վրաստանում ՀՀ դեսպանության մամուլի ծառայությունը հայտարարություն է տարածել, որում տեղեկություններ է հաղորդում Վրաստանի Օզուրգեթի քաղաքում անհայտ անձանց կողմից հարձակման ենթարկված հայ գործարար, ՀՀ քաղաքացի 31-ամյա Արթուր Սուքիասյանի առողջական վիճակի մասին: Ըստ «Ռուսթավի 2» հեռուստաընկերության ունեցած տեղեկությունների՝ Սուքիասյանը հարձակման է ենթարկվել իր տան շքամուտքի մոտ:
Վրաստանում ՀՀ դեսպանության մամուլի ծառայության հայտարարության մեջ մասնավորապես նշվում է. «Վրաստանում Հայաստանի դեսպանությունը մշտական կապի մեջ է ինչպես տուժածի և նրա հարազատների, այնպես էլ իրավապահ մարմինների հետ։ Արթուր Սուքիասյանն Օզուրգեթիի հիվանդանոցից արդեն տեղափոխվել է Բաթումի քաղաքի հիվանդանոց, գտնվում է բժիշկների վերահսկողության տակ և նրա կյանքին որևէ վտանգ չի սպառնում։ Բժիշկների փոխանցմամբ՝ տուժածը ևս երկու օր պետք է գտնվի նրանց հսկողության տակ և այնուհետև, դուրս գրվի։ Բաթումիում ՀՀ գլխավոր հյուպատոսն արդեն տեսակցել է տուժած ՀՀ քաղաքացուն»։
