Այսօր Դատապարտյալների հիվանդանոց տեղափոխված ավելի քան քսան օր հացադուլի մեջ գտնված «Սասնա ծուռ» Արմեն Բիլյանի առողջական վիճակը, ըստ նրա պաշտպանի, ծայրահեղ ծանր է:
Արմեն Բիլյանի պաշտպան Արմինե Ֆանյանի խոսքով`իր պաշտպանյալի՝ հացադուլ սկսելու հաջորդ օրվանից սկսած տարբեր պաշտոնյաներին, ում իրավասության մեջ է մտել նրա տեղափոխումը, դիմումներ են ուղղվել՝ խնդրանքով կազմակերպել Բիլյանի պատշաճ բժշկական օգնությունը ու լուծել նրա տեղափոխման հարցը՝ հաշվի առնելով, որ նրա խցային պայմանները անհամատեղելի են նրա առողջական վիճակի հետ: Հիշեցնենք, որ Բիլյանը հացադուլ էր սկսել՝ պահանջով, որ իրեն տեղափոխեն «Արմավիր» ՔԿՀ:
«Տարբեր ֆորմալ գրություններ եմ ստացել, թե նախորդ տարվա ընթացքում ինչ հետազոտություններ են կատարվել. «Բայց այդ հետազոտությունների մեծ մասը մեր միջոցներով են արվել, այդ թվում ողնաշարի յամերը կատարվել է մեր միջոցների հաշվին»:
Փաստաբանի խոսքով, ՔԿՀ-ից իրեն ու դատարանին միաժամանակ երկու գրություն է հասել, դատարանին ուղղված գրության մեջ նշված է եղել, որ տեղափոխման անհրաժեշտություն չկա, իսկ իրեն ուղղված գրության մեջ նշվել է, որ տեղափոխման համար վարույթ իրականացնող մարմնից թույլտվություն է անհրաժեշտ:
«Պաշտպանյալիս վիճակը ծայրահեղ ծանր է»,- հավելեց Բիլյանի փաստաբանը: Նա նաեւ հայտնեց, որ դատարանը թե՛ իր պաշտպանյալի, թե՛ նրա հետ հացադուլ սկսած մեկ այլ «Սասնա ծուռ» Սմբատ Բարսեղյանի դեպքում գրություն է տվել՝ նշելով, որ նրանց տեղափոխման առումով առարկելու իրավասություն չունի:
Արփինե ՍԻՄՈՆՅԱՆ
