«ՀՀԿ-ն եւ ՀՅԴ-ն համագործակցության հուշագիր են ստորագրել այս խորհրդարանի գործունեության ողջ ժամկետում համագործակցության համար եւ չկա որեւէ պատճառ, որպեսզի մեր դրած նպատակներից հրաժարվենք»,- խորհրդարանում լրագրողների հետ զրույցում այսօր հայտարարեց ՀՀ բնապահպանության նախարար, ՀՅԴ անդամ Արծվիկ Մինասյանը`պատասխանելով ՀՅԴ-ՀՀԿ հետագա համագործակցությանը վերաբերվող հարցին: Ասաց`քանի դեռ ՀՅԴ-ն կոալիցիայում է, ինքն էլ պաշտոնավարում է`հիմք չի տեսնում դժգոհել կառավարության գործունեությունից: Այլապես, ինքն ունի այնքան բարոյականություն եւ սկզբունքայնություն`համապատասխան քայլեր ձեռնարկելու համար:
Aravot.am-ի հարցին`ՀՅԴ-ում խանդո՞վ կվերաբերվեն, եթե «Ծառուկյան» դաշինքը եւս համալրի կոալիցիայի շարքերը, Արծվիկ Մինասյանն ասաց. «Այդ քաղաքական բնույթի հարցին կպատասխանեի, եթե լինեի պառլամենտի անդամ»:
Ասում է նաեւ, որ իբրեւ գործադիրի ներկայացուցիչ, մեկ բան գիտի`ցանկացած այլ ուժի աջակցությունն իրենց առջեւ դրված խնդիրների լուծմանն օգտակար է. «Բայց դա չի նշանակում, որ ցանկացած ուժ, որն աջակցում է, պարտադիր պետք է կոալիցիայում լինի»:
Նրա մոտ տարակուսանք առաջացրեց դիտարկումը, որ «Ծառուկյան» դաշինքի կոալիցիա մտնելու արդյունքում ՀՅԴ-ի պորտֆելները կարող են պակասել: «ՀՅԴ-ն երբեւէ նման որեւէ մտավախություն ունեցե՞լ է»,- հարցին հարցով պատասխանեց Արծվիկ Մինասյանը:
Մանրամասները`տեսանյութում
Նելլի ԳՐԻԳՈՐՅԱՆ
