ԱԺ Տարածքային կառավարման, տեղական ինքնակառավարման, գյուղատնտեսության եւ բնապահպանության հարցերի մշտական հանձնաժողովում այսօր քննարկվում էր «Հայաստանի Հանրապետության ջրային օրենսգրքում փոփոխություններ եւ լրացումներ կատարելու մասին» նախագիծը եւ կից ներկայացված նախագծերի փաթեթը:
Հարցի հիմնական զեկուցող, ՀՀ բնապահպանության նախարար Արծվիկ Մինասյանն ասաց`ուսումնասիրել են ջրամատակարարման համակարգը եւ եկել այն եզրակացության, որ դրանում քիչ տեղ է զբաղեցրել ջրահեռացման խնդիրը։ Ներկայացված փաթեթի նպատակն էլ հենց ջրահեռացման հարցերի կարգավորումն է, ինչը իր համոզմամբ, կբերի շրջակա միջավայրի աղտոտման շեշտակի նվազեցման:
Արծվիկ Մինասյանն ասաց`հարցը մանրամասն քննարկել են բնապահպանության նախկին նախարար Արամ Հարությունյանի հետ: Ու ինքն իրեն ուղղեց. «Նախարարը նախկին չի լինում»:
Արամ Հարությունյանն էլ ասաց`հարցը բնապահպանական առումով համարձակ է: Որոշ վերապահումներ ուներ: Դրանք Արծվիկ Մինասյանի համար այդքան էլ հասկանալի չէին, բայց խոստացավ քննարկել:
«Նախագծով սահմանվում է հասկացություն, թե որքան է կեղտաջուրը՝ կենցաղային, արտադրական, նաև հեղեղատներով տեղափոխվող, սահմանված արտանետումների հստակ չափանշով է սահմանվելու` ամեն մեկի համար տալով պատիժ: Մասնավորապես, նախատեսվում է, որ կեղտաջրերի հեռացման համար հստակ կանոններ գործեն, որ արտադրական կեղտաջրերը չխառնվեն կոյուղաջրերի հետ»,-ասաց բանախոսը`նշելով, որ լինում են դեպքեր, երբ կոյուղաջրերը գյուղացիների կողմից ոռոգման նպատակով են օգտագործվում, արդյունքում «ավերում են» ամեն ինչ՝ գյուղմթերքի որակ եւ այլն: Նախագծով նախատեսվում է, որ բոլոր համայնքները պետք է ունենան համակարգեր, որոնք ապահովելու են հեռացման եւ մաքրման կառուցվածքներ: Պետք է նաեւ բնակչության հասանելիություն լինի: Բայց, քանի որ համակարգերի ներդրումը մեծ բեռ է, պարտադրման գործողությունը հետաձգվել է 25-ից մինչև 30 թվական` հնարավորություն տալով թե մասնավոր հատվածին, թե կառավարությանը, ներգրավել աշխատանքներում:
Հաջորդ կարգավորմամբ, ջրի կրկնակի օգտագործման դեպքում արտոնություն կտրամադրվի: «Եթե առաջին անգամ օգտագործվող ջուրը վերածվում է կեղտաջրի կամ արտանետումների ծավալը մեծ է, բայց մաքրվում, նոր է հեռացվում, այդ դեպքում առաջակում ենք հարկային օրենսգրքի փոփոխությունների միջոցով, ոչ այս փաթեթով, հետագայում արտոնություններ սահմանել թե առաջնային, թե երկրորդային օգտագործողի համար, որպեսզի խթանենք համակարգը, որ կազմակերպությունները, համայնքները մասնակից դառնան այս համակարգին»,-մանրամասնեց նախարարը:
«Ծառուկյան» խմբակցության պատգամավոր Հրանտ Մադաթյանը Արծվիկ Մինասյանից խնդրեց ժողովրդի համար պարզ եւ մատչելի ասել, թե այս փոփոխություններով ի՞նչ է սպասվում: «Պարզ, ժողովրդին հասկանալի ասեք` ի՞նչ է կատարվելու այս օրենքը ընդունելուց հետո։ Կոնկրետ Գեղարքունիքի մարզի հարցով ասեք. Սևանա լիճը համարվում է տարածաշրջանում եւ աշխարհում խմելու ջրի երկրորդ պաշարը, եւ հանրապետության առվակները, գետերը վերջնարդյունքում լցվում են Սեւան։ Ի՞նչ է կատարվելու թե գյուղական, թե քաղաքային համայնքներում օրենքի ընդունումից հետո»,-հարցրեց պատգամավորը: Նախարարը նկատեց`Սեւանա լիճը բնական էկոհամակարգ է, որը մաքրության տեսակետից պետք է օրինակ ծառայի: Մինչդեռ Սեւան լցվող գետերի մեծ մասի աղտոտումները մեծածավալ են, եւ ընդամենը 3 մեխանիկական մաքրման կայան կա:
Մանրամասները`տեսանյութում
Նելլի ԳՐԻԳՈՐՅԱՆ
