2017 թվականին Արցախում համախառն ներքին արդյունքի աճը կկազմի 15 տոկոս, որից 6 տոկոսային կետը կապահովվի հանքարդյունաբերության հաշվին: Այս մասին հրավիրած մամուլի ասուլիսում հայտնել է ԱՀ ֆինանսների նախարար Գրիգորի Մարտիրոսյանը:
«Մնացած 9-ը տոկոսը կապահովեն տնտեսության հետևյալ ճյուղերը. 2 տոկոսային կետ՝ մշակող արդյունաբերություն և էներգետիկա, 1.5 տոկոսային կետ կապահովվի շինարարության ոլորտից, 1.2 տոկոսային կետ`գյուղատնտեսությունից, իսկ ֆինանսական ոլորտի հաշվին կապահովվի շուրջ 3.8 տոկոսային կետ››,- պարզաբանեց Գրիգորի Մարտիրոսյանը:
2017 թվականի պետական բյուջեի կատարողական ցուցանիշները ներկայացնելով` նախարարը նշեց, որ հարկային եկամուտների կատարողական ծրագիրը գերակատարվել է 6.1 տոկոսով, ինչն աննախադեպ ցուցանիշ է վերջին տասը տարիների ընթացքում. ‹‹Գերակատարման գումարը, որը կազմում է 2.2 մլրդ, միայն շուրջ 50 տոկոսն է ապահովվել ‹‹Բեյզ Մեթըլս›› ընկերության կողմից տրված լրացուցիչ հարկերով, իսկ մնացած մասը ապահովվել է այլ հարկատուներով, ինչը պայմանավորված է նրանց տնտեսական գործունեության ակտիվությամբ››:
Նախարարը նաև նշեց, որ 2017 թվականի պետական բյուջեի ծախսերը կազմել են 92 մլրդ դրամ, ինչը ծրագրվածի 97 տոկոսն է` արդյունքում տնտեսվելով 3 տոկոս:
Դավիթ ԱԲԱՂՅԱՆ
