«Ժիրայր Սեֆիլյանի եւ մյուսների» գործով դատավարությունը մոտենում է դատական վիճաբանությունների փուլին, որի ընթացքում առաջնահերթ ներկայացվելու են մեղադրական եւ պաշտպանական ճառերը:
Մինչ այդ այսօրվա նիստում ամբաստանյալներից Հրայր Թոփչյանի շահերի պաշտպան, փաստաբան Գեորգի Մելիքյանը միջնորդություն ներկայացրեց՝ հարցաքննության նպատակով դատարան հրավիրել ՀՀ ոստիկանության Փորձաքրեագիտական վարչության փորձագետ Ռ. Պողոսյանին:
Պաշտպանը հիշեցրեց, որ գործում որպես իրեղեն ապացույցներ առկա են երկու ինքնաձիգեր եւ 4 պահունակներում առկա 120 փամփուշտներ, որոնց մասին արձանագրություն է կազմել փորձագետ Ռ. Պողոսյանը:
Փաստաբանի խոսքով՝ վերջինիս փորձագիտական եզրակացության մեջ կան անհամապատասխանություններ, ուստի դրանք ճշտելու նպատակով անհրաժեշտ է դատարանում հարցաքննել Պողոսյանին: «Գտնում ենք, որ առկա են իրեղեն ապացույցների անօրինական ոչնչացման փաստեր: Օրինակ, առկա 120 փամփուշտներից դատարանում հետազոտման ժամանակ բացակայում էին 20-ը: Փորձագետն այդ մասով գրել է, որ դրանք օգտագործվել են, սակայն դրանք իրեղեն ապացույցներ են, եւ թեկուզ օգտագործված վիճակում փորձագետը պարտավոր էր դրանց օգտագործված իրանը եւ գլխիկը վերադարձնել փորձաքննությունը նախաձեռնողին: Անհրաժեշտ է հարցաքննության միջոցով փորձագետից պարզել՝ եթե առանց կրակելու հնարավոր չէր պարզել փամփուշտների պիտանիությունը, ապա ինչպես կարելի է թույլատրելի համարել փորձագետի այն հետեւությունը, թե մնացած փամփուշտները պիտանի էին կրակելու համար»,-նկատեց Գեորգի Մելիքյանը:
Թեեւ այս գործով մեղադրող-դատախազները միջնորդության դեմ առարկեցին՝ գտնելով, որ փորձագիտական եզրակացությունը սպառիչ է եւ անհամապատասխանություններ չունի, դատավոր Տաթեւիկ Գրիգորյանը նկատեց. «Պաշտպանական կողմը գտնում է, եզրակացությունը պարզաբանման անհրաժեշտություն ունի: Դատարանը եւս կարծում է, որ առկա են հիմքեր՝ փորձագետին դատարանում հարցաքննելու համար»: Այսպես, միջնորդությունը բավարարվեց, նիստն էլ հետաձգվեց, որպեսզի հաջորդ ուրբաթ դատարան հրավիրվի փորձագետը:
Հիշեցնենք, որ «Հիմնադիր խորհրդարան» ընդդիմադիր շարժման առաջնորդ, Շուշիի առանձնակի գումարտակի հրամանատար Ժիրայր Սեֆիլյանը մեղադրվում է ապօրինի զենք-զինամթերք պահելու, հանցավոր նպատակներով խումբ (ամբաստանյալներ՝ Ներսես Պողոսյան, Սասունիկ Կիրակոսյան, Գալուստ Գրիգորյան, Հովհաննես Պետրոսյան, Գեւորգ Սաֆարյան, Հրայր Թոփչյան) ձեւավորելու, զորամաս եւ Երեւանի հեռուստաաշտարակը զավթելու փորձի մեջ:
Լուիզա ՍՈՒՔԻԱՍՅԱՆ
