Դեկտեմբերի վերջին ադրբեջանական ազգայնական կազմակերպության մի խումբ անդամներ ներխուժել են Բաքվի ավագ դպրոցներից մեկը և ստորացրել ուսուցիչներից մեկին, որն ավելի վաղ սոցցանցերում տարածել էր հայկական տարազ հագած իր աշակերտներից մեկի լուսանկարը:
Ռովշան Ազիզովը հայկական տարազով աշակերտի լուսանկարը տեղադրել էր Facebook-ում նոյեմբերին. լուսանկարում աշակերտը կանգնած է Բաքվի հայկական եկեղեցու ֆոնին:
«Նրանք ինձ ստորացրին իմ աշակերտների առաջ: Նրանք ինձ հայ էին կոչում»,- Eurasianet-ի հետ զրույցում պատմել է Ռովշան Ազիզովը:- Նրանք ասում էին, որ ես հայ գործակալ եմ, որ հայերի հրահանգով եկել եմ Ադրբեջան այս երկիրը կործանելու համար: Ես պարզապես ցանկանում էի ցույց տալ, որ խաղաղություն հնարավոր է, և որ մենք չենք կարող այս հակամարտությունը լուծել միմյանց սպանելով:
Սոցցանցի օգտատերերը նկատել են, որ իր նախկին գրառումներում էլ Ազիզովն առաջ է տանում Հայաստանի հետ խաղաղության տեսակետը: Մասնավորապես, Ազիզովի էջում նրանք նկատել էին իրար կողքի ծածանվող Հայաստանի ու Ադրբեջանի դրոշներ՝ հայերեն և ադրբեջաներեն կից գրառմամբ. «Ես ապրում եմ Ադրբեջանում: Ես պատերազմ չեմ ուզում: Ես խաղաղություն եմ ուզում: Պարտադիր չէ, որ մենք արյուն թափենք»:
Ազիզովը պատմել է, որ ինքը մինչ դպրոցում տեղի ունեցած այդ միջադեպը ճնշումների է ենթարկվել նաև դպրոցի ղեկավարության կողմից: «Նրանք ինձ ասում էին. «Ավելի լավ է՝ գնաս: Եթե մնաս, դու վտանգում ես մեր և երեխաների կյանքը»: Ուսուցիչներն աշակերտներին ասում էին, որ ես հայ եմ, և որ նրանք հեռու մնան ինձնից»,- պատմել է ուսուցիչը:
Ի դեպ ավելի վաղ իր հարցազրույցներից Ազիզովը չի բացառել, որ ինքը կարող է հայ լինել:
Նա մանուկ հասակում որդեգրվել է ադրբեջանական ընտանիքի կողմից և միշտ մտածել է, որ իր կենսաբանական ծնողները, ամենայն հավանականությամբ, ռուս են: Սակայն 2014թ. իր որդեգիր մոր մահից հետո նա սկսել է փորփրել իր անցյալը: Նրա որդեգիր մորը երիտասարդ տարիքում ճանաչող մարդիկ հավատացրել են, որ նա ծնվել է հայկական ընտանիքում:
Դեկտեմբերի 28-ին, Ազիզովն աշխատանքից հեռացվել է: Դպրոցի ղեկավարությունը պնդում է, որ պատճառը ոչ թե նրա հայամետ դիրքորոշումն է, որ այլ նրա՝ դասավանդման այլընտրանքային մեթոդները:
Eurasianet-ը նկատում է, որ ադրբեջանական դպրոցական դասագրքերը հայերին նկարագրում են խիստ բացասական գույներով: Դրանցում հաճախ են հանդիպում «հայ ահաբեկիչներ, հայ ֆաշիստներ, հայ անջատողականներ, հայ ավազակներ, հայ բարբարոսներ, թշնամի» և այլ եզրեր:
Պատրաստեց՝ Վիկտորյա ԱՆԴՐԵԱՍՅԱՆԸ
