Այսօր Կենտրոն եւ Նորք Մարաշ վարչական շրջանների ընդհանուր իրավասության դատարանում ԱԱԾ-ի կողմից հայտնաբերված Մարաշի զինված խմբի գործով դատական նիստն էր:
Հիշեցնենք, որ այդ գործով զինված խմբի ղեկավար Արթուր Վարդանյանը մեղադրվում է նրանում, որ ունենալով զինված գործողությունների մասնակցության փորձ եւ ռազմական հմտություններ, իշխանությունը զավթելու նպատակով ստեղծել է հանցավոր համագործակցություն:
Այսօր դատական նիստը նշանակված էր ժամը 11-ին, մինչդեռ արդեն 11.35 էր, դատական դահլիճի դռները փակ էին, որեւէ տեղեկություն չէր հայտնվում այն մասին, թե ինչու է նիստը հետաձգվում:
Ավելի ուշ պարզվեց, որ ամբաստանյալներից մեկի՝ Հարություն Սարիբեկյանի առողջական վիճակը վատացել է եւ շտապօգնություն են կանչել:
Մինչ այդ Վահան Շիրխանյանի պաշտպան Հայկ Ալումյանը ուժգին հարվածում էր դատարանի դահլիճի դռներին, դռները դմբդմբացնում, զանգահարում դատավորի աշխատասենյակ, դատարանի աշխատակազմի համարներով եւ դժգոհում նիստի մասնակիցների նկատմամբ նման անհարգալից վերաբերմունքի համար: Հետո նա հայտարարեց, որ հեռանում է, որովհետեւ սա համարում է իրենց նկատմամբ արհամարհական վերաբերմունք, իսկ դատական կարգադրիչների խոսքին, որ շտապօգնություն են կանչել՝ Ալումյանն արձագանքեց, որ սրտաճմլիկ բաներ են ասում եւ պատրվակներ են բերում:
Դատավոր Բեկթաշյանը, նիստը սկսելուն պես Ալումյանի բացակայությունը որակեց դատարանի նկատմամբ անհարգալից վերաբերմունք: Մինչդեռ մյուս փաստաբանները հակադարձեցին՝ ասելով, որ իրենք էլ մի քանի անգամ զանգել են դատավորի աշխատանքային համարներով, իրենց որեւէ հարկ չեն համարել բացատրել:
Դատավորը արձագանքեց. «Ես իմ աշխատասենյակում նստած եմ եղել, ոչ մի հեռախոսազանգ չի եկել»:
Իսկ ամբաստանյալ Սարիբեկյանը պնդեց, որ իրեն շտապօգնություն է պետք եղել 11.30-ից հետո:
Մանրամասները՝ տեսանյութում:
Հռիփսիմե ՋԵԲԵՋՅԱՆ
