«Մեղք եք, խղճում եմ ձեզ». կաշառք վերցնելու մեջ մեղադրվող նախկին դատավորի նյարդերը տեղի տվեցին

Կաշառք վերցնելու մեջ մեղադրվող դատավոր Իշխան Բարսեղյանի գործով հերթական  դատական նիստում այսօր նրա շահերի պաշտպանները մեկ այլ միջնորդություն էլ ներկայացրին՝ դատարանից պահանջելով պաշտպանական կողմին տրամադրել այն նյութերը, որոնք ԱԱԾ-ն ժամանակին ներկայացրել է Կենտրոն եւ Նորք Մարաշ վարչական շրջանների ընդհանուր իրավասության դատարան՝ Իշխան Բարսեղյանի հանդեպ օպերատիվ հետախուզական միջոցառումներ (ՕՀՄ՝ հեռախոսազանգերի գաղտնալսում) անցկացնելու մասին թույլտվություն ստանալու համար: Խնդիրն այն է, որ ըստ պաշտպանական կողմի՝ ԱԱԾ-ն ՕՀՄ-ներ է կատարել մեկ փաստի՝ Նորիկ Հակոբյանի հաղորդման հիման վրա, իսկ մեկ փաստի հիման վրա ՕՀՄ անցկացնելն օրենքի խախտում է:

Իշխան Բարսեղյանի շահերի պաշտպաններից փաստաբան Կարեն Հովհաննիսյանն ընդգծեց, որ ըստ Նորիկ Հակոբյանի հաղորդման՝ Իշխան Բարսեղյանը ոչ թե անձամբ է պահանջել Հակոբյանի օգտին դատական ակտ կայացնելու համար հազար ԱՄՆ դոլար տալ իրեն, այլ դա արվել է ոմն Էլզայի (գործով մյուս ամբաստանյալ Էլզա Զաքարյանը, որը մեղադրվում է կաշառքի միջնորդություն կատարելու մեջ) միջոցով. «Նորիկ Հակոբյանը չի ասել, որ անձամբ Իշխան Բարսեղյանն է պահանջել այդ գումարը: Նա ասել է, որ ոմն Էլզայի միջոցով է տեղեկացել, որ Բարսեղյանը գումար է պահանջում: Երրորդ անձի կողմից տեղեկություն ստանալու հիմքով ԱԱԾ-ն իրավունք չուներ ՕՀՄ իրականացնել»:

Կարեն Հովհաննիսյանի խոսքով՝ ԱԱԾ ունեցած տեղեկությունները գաղտնի չեն եղել եւ դատարանը պարտավոր է այդ նյութերը տրամադրել պաշտպանական կողմին:

Իշխան Բարսեղյանի մյուս պաշտպաններից Արա Ղազարյանն էլ մատնանշեց. «ԱԱԾ-ն ունեցել է մեկ փաստական տվյալ՝ Նորիկ Հակոբյանի հաղորդումը: Մեկ փաստի հիման վրա կոպիտ եւ գռեհիկ կերպով որոշել է ներխուժել անձի անձնական կյանք՝ քմահաճորեն: Չի կարելի նման կերպ ներխուժել անձնական տիրույթ: Կամ ԱԱԾ-ն այլ տվյալներ է ունեցել, որը մենք պահանջում ենք մեզ տրամադրել, կամ ոչ: Եթե չի ունեցել, ուրեմն խախտել է օրենքը»:

Դատավոր Վաչե Մարգարյանը քննելով նշյալ միջնորդությունը, որոշեց այն մերժել: Սա զայրացրեց ամբաստանյալ Իշխան Բարսեղյանին: Նախկին դատավորի նյարդերը տեղի տվեցին: «Մեղք եք, խղճում եմ ձեզ»-տեղից՝ առանց դատավորի թույտվության, խոսեց նա:

Դատարանի հանդեպ անհարգալից վերաբերմունքի համար դատավոր Վաչե Մարգարյանը նրան ենթարկեց սանկցիայի՝ նախազգուշացման տեսքով:

Լուիզա ՍՈՒՔԻԱՍՅԱՆ