ԱԺ «Ելք» խմբակցության պատգամավոր Գեւորգ Գորգիսյանը պնդում է, որ գնաճի դեմ իրենց նախաձեռնած պայքարը ոչ թե իրենց կուսակցության քաղաքական օրակարգի հարցն է, այլ Հայաստանի քաղաքացիների:
«Սա «Ելքի» քարոզարշավը չէ, «Ելքի» շահերը չեն, ՀՀ քաղաքացիների շահերն են, հրավերքի սպասելու իմաստը ո՞րն է, երթ ենք անում, եթե ցանկանում եք պայքարել թանկացումների դեմ, միացեք դրան: Ինչ պաշտոնական հրավերքի մասին է խոսքը: Սա «Ելքի» քաղաքական օրակարգը չէ, սա ՀՀ քաղաքացիների ամենօրյա օրակարգն է, առօրյա հոգսն է, որի համար ուզում ենք պայքարել»,- պայքարին միանալու հրավերքին սպասող քաղաքական ուժերին նկատի ունենալով՝ ասաց պարոն Գորգիսյանը: Հիշեցնենք, որ հունվարի 19-ին «Ելքը» ընդդեմ գնաճի բողոքի ցույց է նախատեսել:
«Ժառանգություն» կուսակցության փոխնախագահ Արմեն Մարտիրոսյանը «Ելքի» պայքարին միանալ-չմիանալու մասին 1in.am-ին ասել էր. «Ես այլ քաղաքական միավորման ներկայացուցիչ եմ, այսինքն, եթե ունեն իրենց քաղաքական օրակարգը, գնամ իրենց օրակարգին մասնակցեմ, որ ի՞նչ անեմ…Ինչ-որ հարցեր են քննարկել, որոշել են ամսի 19-ին անել…գնամ ուրիշի հարսանիքին ծափ տա՞մ, անկոչ հյուր հո չեմ: Իմ բոլոր գործընկերներն ասել են, որ ընդդիմությունից որեւէ մեկը միայնակ չի կարող Հայաստանում իրավիճակ փոխել, համատեղ ջանքեր են պետք»:
Ըստ Գեւորգ Գորգիսյանի՝ միայնակ ոչինչ հնարավոր չէ փոխել, բայց. «Մի ծաղկով գարուն է գալիս, մի ծաղկով, եթե նույնիսկ գարուն չի գալիս, ձմեռը վերջանում է: Պետք է լինի ինչ-որ մեկը, որ ինչ-որ բան սկսի անել, որ հետո մարդիկ փորձեն համախմբվել դրա շուրջը, հիմա «Ելքը» այդ ուժն է, ցանկանում ենք համախմբել հասարակությանը, քաղաքացիներին, որ կարողանանք ինչ-որ փոփոխություններ բերել մեր երկրում, փակել թանկացումների ճանապարհը: Հենց հիմա սկսել է թանկացումների օրեցօր աճող սպառնալիքը»:
Անդրադառնալով նախօրեին ՀՀ նախագահի հրավիրած խորհրդակցությանը՝ գնաճն ու դրա հետեւանքները մեղմելու վերաբերյալ՝ ասաց. «Որեւէ էական պատճառի մասին խոսք չգնաց, այն հիմքերի, թե ինչու է ամեն ինչ թանկացել: Հիմնական թանկացումները Հարկային օրենսգրքի պատճառով է. Ընդ որում, այդ նույն օրենսգրքով նվազել է քաղաքացիների եկամուտը, որովհետեւ ավելացել է հարկային բեռը, դրանց մասին ոչ մի խոսք, Սերժ Սարգսյանը ուղղակի կոչ էր անում թույլ չտալ թանկացումները…սա ինչ-որ քաղաքացիների աչքերին թոզ փչելու հերթական հնարքն է, որեւէ լուրջ սպասելիքներ չկան, քանի դեռ քաղաքացիները հաստատակամ դուրս չգան պահանջեն, որ գնաճ տեղի չունենա»:
Արփինե ՍԻՄՈՆՅԱՆ
