«Շուրջ 2 միլիարդ դրամի պարտք ունենք, պտուղ-բանջարեղենի եւ խաղողի դիմաց վճարումները 90%-ով կատարվել են, մնացածը վերամշակող ընկերությունները գյուղացիների հետ պայմանավորվել են, որպեսզի մինչեւ ապրիլի 1-ը վճարեն»: Այսօր այս մասին կառավարության նիստից հետո լրագրողների հետ ճեպազրույցում ասաց գյուղատնտեսության փոխնախարար Ռոբերտ Մակարյանը:
Անդրադառնալով «Վինար» ընկերությանը, Մակարյանը վստահեցրեց, որ խնդիրը լուծվել է. «Դեկտեմբերի վերջին գումարները բաժանվել են, 34 միլիոն դրամ պարտք էր մնացել, 31 միլիոնը վճարվել է, 3 միլիոնն էլ կա, ուղղակի տեխնիկական պատճառներով գյուղացիական տնտեսությունները չեն ներկայացել: Առաջիկա օրերին այդ գումարը կբաժանվի գյուղացիներին»:
Հիշեցնենք, որ «Վինար» ընկերությունը տեւական ժամանակ գյուղացիներից ձեռք բերված խաղողի գումարը չէր վճարում: Գյուղացիները պարբերաբար բողոքի ցույցեր էին անում եւ պահանջում վճարել իրենց գումարը:
Նելլի ԲԱԲԱՅԱՆ
