Այսօրվա նիստում կառավարությունը որոշում ընդունեց ապրիլի 1-ից արգելել աջ ղեկով մեքենաների ներմուծումն ու շահագործումը Հայաստանում:
Տրանսպորտի, կապի և ՏՏ նախարար Վահան Մարտիրոսյանն ասաց, որ շահագործման արգելքը վերաբերում է միայն ապրիլի մեկից հետո ներմուծվող ավտոմեքենաներին, իսկ մինչ այդ ներմուծված ու շահագործված մեքենաների սեփականատերերը կարող են ազատ տնօրինել դրանք՝ վաճառել կամ շահագործել:
Ըստ նախարարի՝ քանի որ Հայաստանում օրենքով աջակողմյան երթևեկություն է, ապա պետք է շահագործվեն ձախ ղեկով ավտոմեքենաներ, որովհետեւ աջ ղեկային կառավարմամբ տրանսպորտային միջոցները վտանգ են ներկայացնում երթևեկության համար:
Նիստը վարում էր փոխվարչապետ Վաչե Գաբրիելյանը, որը հետաքրքրվեց, թե ճի՞շտ է հասկանում, որ որևէ քաղաքացի, որն այսօր ունի աջ ղեկով մեքենա, որևէ սահմանափակման չի ենթարկվում՝ կարող է և օգտագործել, և օտարել իր մեքենան: Նախարարը դրական պատասխան տվեց եւ ավելացրեց. «Մինչև ապրիլի մեկը ՀՀ մտած ու հաշվառված մեքենաների վրա ոչ մի սահմանափակում չի լինելու»:
Փոխվարչապետը նաև հետաքրքրվեց՝ կա՞ն փաստացի հիմքեր, որ աջ ղեկով մեքենաները խնդիրներ են առաջացնում երթևեկության համար, թե՞ մտահոգությունները զուտ տեսական են: Վահան Մարտիրոսյանն ասաց, որ ըստ ոստիկանության և ապահովագրական ընկերությունների տվյալների՝ աջ ղեկով մեքենաների մասնակցությամբ վթարների քանակը մոտ 28%-ով ավելի է: Բացի դրանից, աջ ղեկով մեքենաների մասնակցությամբ վթարների ժամանակ վիրավորների քանակը մոտ 39 տոկոսով ավելի է, որը դա շատ բարձր թիվ է: Այդ ամենից ելնելով, ըստ նախարարի, կառավարությունը որոշել է գնալ այդ ճանապարհով:
Վաչե Գաբրիելյանը հանձնարարեց պատրաստել համապատասխան օրենքի նախագիծ եւ հաջորդ շաբաթ ներկայացնել կառավարության հաստատմանը, որպեսզի այն անհետաձգելի կարգով ներկայացվի Ազգային ժողովի հաստատմանը:
Նելլի ԲԱԲԱՅԱՆ
