Ավտոմեքենաների ապահովագրություն կատարող «Թոփ-ՍՓին» ՍՊԸ-ի՝ Բագրատաշենի մաքսակետի տարածքում գտնվող գրասենյակը հունվարի 9-ի երեկոյան դադարել է գործել:
«Ինգո Արմենիա» ապահովագրական ընկերության գործակալ Արթուր Ամիրաղյանը հայտնեց, որ այսօր` հունվարի 10-ին ՊԵԿ բարձրաստիճան պաշտոնյաներ են ժամանել Բագրատաշենի մաքսակետ, ուր կայացել է նրանց հանդիպումը ավտոապահովագրություն կատարող ընկերությունների աշխատողների հետ:
ՊԵԿ-ի պաշտոնյաները ապահովագրական ընկերությունների գործակալներին Բագրատաշենի մաքսակետի տարածքում ավտոապահովագրական գործունեություն իրականացնելու վերաբերյալ համագործակցության առաջարկ են արել:
Ա. Ամիրաղյանը հայտնեց, որ 2 օրվա ընթացքում իրենք պետք է պատասխանեն այդ առաջարկին: Մինչ այդ ԱՊՊԱ կատարող գործակալներն այդ առաջարկի պայմանները կքննարկեն միմյանց եւ այն ապահովագրական ընկերության հետ, որի գործակալն են հանդիսանում: Արթուր Ամիրաղյանը վկայությամբ`իրենք ցանկանում են, որ ՊԵԿ-ի հետ այդ համագործակցությունը լինի ոչ ժամանակավոր, դրանից շահեն ավտոապահովագրողները, նրանց հաճախորդները եւ Բագրատաշենի մաքսակետը:
Ոսկան ՍԱՐԳՍՅԱՆ
