«Արցախում նախորդ տարի արձանագրված երկնիշ թվով տնտեսական աճը անպայման իր մուլտիպլիկատիվ էֆեկտն է ունենալու բնակչության կենսամակարդակի բարելավման վրա»,- Aravot.am-ի հետ զրույցում ասաց ԱՀ ազգային վիճակագրական ծառայության նախագահ Կարեն Ներսիսյանը` հավելելով, որ պետությունն ունի ընդգծված սոցիալական պետական աջակցության ծրագրեր:
Անդրադառնալով նախորդ տարում ազգային վիճակագրական ծառայության կողմից իրականացված կարևոր ծրագրերին` Կարեն Ներսիսյանը գրանցված ձեռքբերումներից է համարում կապիտալ շինարարության չհաշվառվող հատվածի ծավալների հետազոտությունը. ներդրվել է անհատական բնակարանային շինարարությունների հետազոտության ծրագիր:
Բացի այդ վիճակագրական ծառայության կողմից գյուղատնտեսության համատարած հաշվառման գործում` մասնավորապես անասնապահության ոլորտում, անասնագլխաքանակի առկայության և շարժի վերաբերյալ արդեն կատարվում է հաշվառում: Դրա կատարման առավել անհրաժեշտությունը Կարեն Ներսիսյանը պատճառաբանում է նրանով, որ անասնագլխաքանակի վերաբերյալ միշտ չէ, որ համայնքները տրամադրում էին արժանահավատ տվյալներ:
«Այս տարում արդեն կկատարվի նաև ավելի համապարփակ և ամբողջական տվյալների ներկայացում` շրջակա միջավայրի և բնական պաշարների վերաբերյալ և բացի այդ նաև բնակչության առողջության վրա շրջակա միջավայրի գործոնների ազդեցության գնահատման ցուցանիշների և տեղեկատվական շտեմարանների ձևավորում»,- ներկայացրեց ծառայության նախագահը:
Լուսանկարը` phoenixtour.org կայքից
Դավիթ ԱԲԱՂՅԱՆ
