Անկարան Սիրիայի նախագահ Բաշար Ասադի դաշնակիցներ Մոսկվային ու Թեհրանին կոչ է արել ազդել Դամասկոսի վրա՝ դեէսկալացիայի գոտում հրադադարի ռեժիմի խախտման պատճառով, գրում է Deutsche Welle-ն:
Ռուսաստանի ու Իրանի դեսպաններին հրավիրել են Թուրքիայի ԱԳՆ, որտեղ նրանց մտահոգություն են հայտնել Սիրիայի կառավարական զորքերի վերջին գործողությունների կապակցությամբ։
Սիրիայի նախագահ Բաշար Ասադի դաշնակիցներ Ռուսաստանի և Իրանի դիվանագիտական ներկայացուցիչներին առաջարկել են ազդել Դամասկոսի վրա, որը խախտում է հրադադարի ռեժիմը դեէսկալացիայի գոտում։
«Կառավարական զորքերի նման գործողությունները սասանում են Սիրիայում ճգնաժամի քաղաքական կարգավորման գործընթացը»,- ասել է Թուրքիայի արտգործնախարար Մևլութ Չավուշօղլուն:
Չավուշօղլուի խոսքով՝ սիրիական զորքերը «Ֆաթհ աշ Շամ»՝ նախկինում հայտնի որպես «Ալ-Նուսրայի ճակատ», խմբավորման դեմ պայքարի պատրվակով հարվածներ են հասցնում չափավոր ընդդիմության ուժերին։
Հիշեցնենք, որ հունվարի 7-ին Իդլիբի նահանգի հյուսիս-արևելքում ավիահարվածների հետևանքով զոհվել էր առնվազն 21 խաղաղ բնակիչ։ Սիրիայում Մարդու իրավունքների դիտորդական կենտրոնը (SHR) կատարվածի պատասխանատվությունը բարդել էր ՌԴ ավիացիայի և Սիրիայի վրա։ Նշենք, որ Իդլիբի նահանգի մեծ մասը նախկինի պես վերահսկում են չափավոր ընդդիմության ուժերը, որոնց մի մասին սատարում է Թուրքիան։
Պատրաստեց Վիկտորյա Անդրեասյանը
