Վանաձորի քաղաքապետ Մամիկոն Ասլանյանը տեղեկություններ չունի նախօրեին Վանաձոր քաղաքում գործող «Հացատուն ԳՏԱ» խորտկարանում տեղի ունեցած վիճաբանություն-ծեծկռտուքի մասին, որին, shamshyan.com-ի տեղեկություններով, մասնակցել են Վանաձորի նախկին քաղաքապետի որդին՝ Արգիշտի Դարբինյանը եւ ԱԺ պատգամավոր Էդմոն Մարուքյանի եղբայրը՝ Քրիստ Մարուքյանը:
«Բացի մամուլի հրապարակումներից, որեւէ բան ինձ հայտնի չէ: Երկու կողմին էլ անձամբ ճանաչում եմ, քաղաքապետի որդիներին շատ լավ գիտեմ ու չեմ կարծում, որ որեւէ վիճաբանություն անեն, դե Քրիստն էլ պարկեշտ տղա է, չեմ մտածում, որ նման բան է եղել»,- ասաց քաղաքապետը:
Մեր հարցին, թե լուրը լսելուց հետո չե՞ք փորձել կողմերի հետ խոսել, ճշտել տեղեկությունը, քաղաքապետը պատասխանեց. «Այսօր մեր առաջին զորակոչն էր, զորակոչիկներին նոր ենք ճանապարհել, ժամանակ չեմ ունեցել»:
Այսօր առավոտից Քրիստ Մարուքյանն անհասանելի է, իսկ նախկին քաղաքապետը՝ Սամվել Դարբինյանը, մեզ հետ զրույցում ասաց, որ այսօր թոռնիկ է ունեցել, ծննդատանն է՝ բարձր տրամադրությամբ, այլ հարցերի չի կարող պատասխանել:
Արփինե ՍԻՄՈՆՅԱՆ
