Արդարադատության նախարարության քրեակատարողական վարչության շենքի դիմաց քիչ առաջ բողոքի ցույց անող քաղաքացիների եւ ոստիկանների միջեւ հրմշտոց տեղի ունեցավ: «Սասնա ծռեր» զինված խմբի անդամների համախոհները որոշեցին փակել Արշակունյաց պողոտայի երթևեկելի հատվածը, ոստիկաններն էլ ուժ գործադրելով նրանց փորձում են հեռացնել երթեւեկելի հատվածից:
Խնդիրն այն է, որ «Հանուն Հայաստան պետության» ընդդիմադիր ճակատի անդամներից Կարապետ Ռուբինյանը մտավ քրեակատարողական վարչություն, իսկ դուրս գալուց հետո հայտարարեց, որ իրեն ընդունել է ոչ թե վարչության ղեկավարը, այլ նրա տեղակալը, որը հստակ ոչինչ չի ասել:
Հիշեցնենք, որ ցուցարարները պահանջում են «Սասնա ծռերի» անդամներից հացադուլավոր Արմեն Բիլյանին տեղափոխել պատշաճ պայմաններով քրեակատարողական հիմնարկ:
Կարապետ Ռուբինյանի խոսքով՝ պետի տեղակալը խոստացել է Արմեն Բիլյանի խնդրին անդրադառնալ, սակայն քաղաքացիները խոստումներին չեն հավատում:
Հավելենք, որ Արմեն Բիլյանը հացադուլի մեջ է 23 օր, իսկ «Սասնա ծռեր» խմբի գործով մյուս ամբաստանյալներից Սմբատ Բարսեղյանը՝ 21 օր:
Բողոքի ցույցը այս պահին ավարտվեց, իսկ ցուցարարները վերադառնում են դատարան, որտեղ շարունակվելու է «Սասնա ծռերի» գործով այսօրվա նիստը:
Լուիզա ՍՈՒՔԻԱՍՅԱՆ
