«Զոլոտոյե պոլե» ընկերությունը ամանորյա նվերներ էր պատրաստել գեղեցիկ փաթեթավորմամբ: Տպավորություն էր, որ նվերի տուփի մեջ լցրել էին այն ամենը, ինչ ձեռքներն էր ընկել, կամ ոչ մեկին պետք չէր` հելուն, ռեզիններ, լազեր, սպիներ, փոքրիկ տոնածառի խաղալիք, ռետինե խաղալիք, որը ջրի մեջ մեծանում է, ժելե հիշեցնող կպչուն նյութ, որը փոքր երեխան կարող է ուտել` շփոթելով կոնֆետի հետ: Տուփի վրա գրված չէր, թե որ սեռի եւ տարիքային որ խմբի համար է նախատեսված նվերը:
Aravot.am-ը տուփի վրա գրված համարով կապվեց ընկերության պատասխանատուի հետ, որը Գեւորգ ներկայացավ:
Նրանից հետաքրքրվեցինք` ո՞ր տարիքի ու ո՞ր սեռի երեխաների համար է նախատեսված իրենց փաթեթավորած նվերը եւ ի՞նչ կարող է տալ այն երեխային դաստիարակչական, երեւակայությունը զարգացնելու կամ հետաքրքիր լինելու առումով:
«Նվերներն ուղղած են մինչեւ 7 տարեկան երեխաներին, եթե Ձմեռ պապիկի նկարով է տուփը` տղաների համար է, Ձյունանուշի նկարով տուփը՝ աղջիկների համար: Գործելու ռեզինը նաեւ տղաներն են օգտագործում»,- հայտնեց «Զոլոտոյե պոլե»-ի պատասխանատուն:
Ապա զարմանքով հավելեց. «Որ կոնֆետ եղավ տուփի մեջ, դա դաստիարակչական նշանակությո՞ւն է ունենալու, դա ինչ-որ բան տալո՞ւ է երեխային: Մենք տուփի մեջ կոնֆետ չենք գցում, որովհետեւ Նոր տարուն կոնֆետները շատ են լինում, դրա համար խաղալիքներ ենք գցել»:
Մեր տարակուսանքին, որ նշված իրերը հետաքրքիր չեն իբրեւ խաղալիք, Գեւորգ ներկայացրած պատասխանատուն պատասխանեց. «Իմ երեխան այդ նվերով լավ էլ խաղում է»:
Ինչ վերաբերում է նրան, որ փոքր տարիքի երեխաների համար տուփում եղածը կարող է վտանգավոր լինել, կարող են բերանը տանել, կոնֆետի հետ շփոթել, մեր զրուցակիցը պատասխանեց. «Դրա համար նվերը չեն տալիս երեխային ու անցնում: Ծնողը բացում նայում է, թե մեջն ինչ կա, որ է տալիս: Ես էլ բացում, նայում եմ, որ երեխան կարող է բերանը տանել, չեմ տալիս, եթե իրեն հարմար չի լինում, դա հանում եմ միջից: Ծնողները պետք է բացեն նայեն` նվերը տա՞ն իրենց երեխային»:
Նա նաեւ հավելեց, որ ինչքան վաճառել են, բոլորը գոհ են մնացել, եւ առաջին դեպքն է, որ դժգոհություն են լսում:
Իսկ թե ինչ սկզբունքով են ընտրվել տուփում եղած իրերը, Գեւորգը պատասխանեց. «Այն սկզբունքով, ինչը վաճառվում է խանութներում»:
Գոհար ՀԱԿՈԲՅԱՆ
