2017 թվականին հայ-ամերիկյան առողջության կենտրոնում կատարվել է 22, 823 կրծքագեղձի հետազոտություն՝ հետազոտվել է 20, 231 կին, որոնցից 800-ի մոտ ախտորոշվել է կրծքագեղձի քաղցկեղ: Այսօր այս մասին «Պոստ սկրիպտում» ակումբում ասաց կենտրոնի ղեկավար Խաչանուշ Հակոբյանը:
Նրա ներկայացմամբ՝ նախորդ տարի հետազոտվել է 122 տղամարդ, նրանցից 5-ի մոտ ախտորոշվել է կրծքագեղձի քաղցկեղ:
Տիկին Հակոբյանը հորդորեց ուշադիր լինել վահանաձեւ գեղձի հիվանդություններին. «Այս հիվանդությունը ծածուկ եւ դանդաղ է ընթանում, եւ մարդիկ չեն էլ մտածում, որ նման խնդիր կա»:
Ըստ Հակոբյանի ներկայացրած ցուցանիշների, 2017-ին կենտրոնում կատարվել է վահանաձեւ գեղձի 2785 հետազոտություն, 978-ի հիվանդի կատարվել է, ինչպես Հակոբյանն ասաց՝ պունկցիա, եւ արդյունքում 291-ի մոտ ախտորոշվել է վահանաձեւ գեղձի քաղցկեղ:
Մանրամասն՝ տեսանյութում
«Վահանաձեւ գեղձը չի զանազանում տղամարդ է, թե՝ կին: Վահանաձեւ գեղձի այս հիվանդության դեպքերում բավականին երիտասարդ, նույնիսկ մանկահասակ տարիքի երեխաներ կան, ինչի համար մենք շատ ու շատ ավելի ուշադիր ենք դարձել»,-ասաց Հակոբյանը: Նրա խոսքերով՝ վահանաձեւ գեղձի հիվանդություններով մարդու մոտ մշտապես թուլություն, քրտնարտադրություն, տրամադրության անկում, անաշխատունակության անկում եւ երեւույթներ են լինում:
Հակոբյանը հորդորում է բոլորին տարին գոնե մեկ անգամ պարտադիր հետազոտվել, քանի որ, ինչպես ինքն ասաց՝ այս հիվանդության դեպքերը վերջին շրջանում շատացել են. «Վերջերս վահանաձեւ գեղձի հիվանդության դեպքերն ավելի ագրեսիվ են դարձել»:
Նախորդ տարի գինեկոլոգիական զննության է ենթարկվել 8921 կին, կատարվել է 14237 հետազոտություն: Կենտրոնում կատարված հետազոտությունների արդյունքներով՝ արգանդի պարանոցի քաղցկեղ հայտնաբերվել է 30 կնոջ մոտ, իսկ նախաքաղցկեղային հիվանդություններ հայտնաբերվել են 44-ի մոտ:
«Որպեսզի մենք ապրենք առողջ, տարին մեկ անգամ պարտավոր ենք անցնել զննությունների շարք, որը կապահովի առողջ ու որակյալ կյանք»,-ասաց Հակոբյանը:
Մանրամասն՝ տեսանյութում
Թե ինչն է պատճառն այս հիվանդության դեպքերի շատացման, Հակոբյանն ասաց, որ դժվար է պատճառ նշել, սակայն սթրեսները, նյարդային համակարգի մի շարք խնդիրների, նաեւ հորմոնալ համակարգի տարբեր տիպի շեղումների արդյունքում նման խնդիրներ են լինում:
Մանրամասն՝ տեսանյութում
Նելլի ԲԱԲԱՅԱՆ
Լուսանկարը` «Պոստ սկրիպտում»-ի
