Իրանի նախկին նախագահ, 61-ամյա Մահմուդ Ահմադինեջադը ձերբակալվել է՝ մեղադրվելով անկարգություններ հրահրելու մեջ։ Այս մասին հայտնում է ibtimes.com-ը:
Ըստ աղբյուրի՝ նա մեղադրվում է Հասան Ռոհանիի ղեկավարած կառավարության դեմ բողոքի ցույցեր հրահրելու մեջ: Հաղորդվում է, թե նա մասնակցել է հակակառավարական հանրահավաքի, որտեղ խոսել է չարաշահումների մասին:
Ըստ լուրերի, որոնք դեռ հաստատված չեն իրավապահ մարմինների կողմից՝ Մահմուդ Ահմադինեջադը ենթարկվել է տնային կալանքի:
Իրանի նախկին նախագահն ասել էր. «Ներկա պաշտոնյաներից ոմանք հեռու են ժողովրդի խնդիրներից ու մտահոգություններից, եւ որեւէ բան չգիտեն հանրային իրողությունների մասին»: Նաեւ նշել էր, թե Իրանն այժմ տառապում է ոչ թե տնտեսական ռեսուրսների պակասից, այլ ոչ արդյունավետ կառավարումից:
«Հասան Ռոհանիի կառավարությունը կարծում է, որ իրենք են երկրի տերը եւ ժողովուրդը տգետ հանրություն է»,- ասել էր նա:
Իրանցի նախկին ճարտարագետ՝ քաղաքական գործիչ դարձած Մահմուդ Ահմադինեժադը, ըստ հրապարակման, 5 միլիոն դոլար արժողությամբ կարողության տեր է: 2005- 2013 թվականը նա ղեկավարել է Իրանը՝ դառնալով նրա վեցերորդ նախագահը:
