«Դրո» գործով ցմահ ազատազրկման դատապարտված Արսեն Արծրունու մոտ առկա է վահանաձեւ գեղձի չափերի մեծացում. «Արեւելք»

Արսեն Արծրունու առողջական վիճակը ճգնաժամային է. այդ մասին հայտնում են նրա հարազատները: Ներկայացնելով Արսենի մոտ հայտնաբերված հիվանդությունը (դիֆուզ բազմահանգուցավոր խպիպ II աստիճանի) եւ բանտային պայմաններում բուժման անհնարինությունը՝ հարազատները հիվանդի կյանքի փրկության միակ ելքը տեսնում են նրան ազատ արձակելու մեջ: «Արեւելքն» այս առիթով զրուցել է Արսեն Արծրունու եղբոր՝ Սեւակ Արծրունու հետ:

-Պարոն Արծրունի՛, օրերս Դուք Դիմատետրի միջոցով Ձեր եղբոր՝ Արսեն Արծրունու առողջական վիճակի հետ կապված ահազանգ էիք հնչեցրել: Ինչպե՞ս է այսօր նրա վիճակը:

-Դիմատետրի վրա արված հայտարարությունն ամբողջությամբ համապատասխանում է իրականությանը: Երկար ժամանակ է՝ ինչ Արսենը տառապում էր տարբեր անհասկանալի հիվանդություններից, բողոքներ ու գանգատներ ուներ, որոնց պատճառը չէինք կարողանում հասկանալ, եւ խնդրեցինք բանտային իշխանություններից, որ թույլ տան բժշկական ընդհանուր հետազոտություն կատարենք, ինչը եւ տեղի ունեցավ: Դժբախտաբար, այդ հետազոտությունների արդյունքները ցույց տվեցին, որ Արսենի մոտ առկա է վահանաձեւ գեղձի չափերի մեծացում: Ավելին, վահանաձեւ գեղձի շրջանում առկա են նաեւ բազմաթիվ ուռուցքներ, հանգույցներ, որոնց ծագումը, հայտնի չէ:

Նկատի ունենալով իր բանտային կացությունը՝ ո՛չ հնարավոր է ավելի խորը հետազոտություն կատարել, ո՛չ էլ հնարավոր է բուժում նախաձեռնել: Նրան վերադարձրեցին բանտ, որտեղ շարունակում է իր առողջական խնդիրների պատանդը մնալ, իսկ այդ խնդիրների հետեւանքներն ամեն ժամ կարող են անդառնալի լինել:

Մենք այս պահին դեռ չգիտենք՝ այդ հանգույցները քաղցկեղածի՞ն են, թե՞ ոչ: Եվ եթե քաղցկեղածին են, ապա մենք շատ-շատ ժամանակ ենք կորցնում, ամեն վայրկյանը թանկ է նրա առողջության համար: Իսկ եթե քաղցկեղածին չեն, ապա սա այն հիվանդությունն է, որը բանտային պայմաններում անհնար է բուժել, ունենում է հետեւանքներ, որոնք ազդում են ոչ միայն գեղձային, հորմոնալ համակարգի վրա, այլեւ նկատելի բացասական ազդեցություն են ունենում նաեւ սրտի, ուղեղի աշխատանքի, շնչառական համակարգի, քնի, կենտրոնացման վրա, մի խոսքով, հիվանդությունը շատ ուղղություններով է իր քայքայիչ հետեւանքները թողնում հիվանդի վրա՝ կրճատելով նրա կյանքի տեւողությունը: Իսկ եթե այս ամենին էլ գումարենք բանտային զրկանքները, հիգիենիկ պայմանների բացակայությունը, հոգեբանական գործոնը եւ շատ այլ հարցեր, ապա կարելի է հասկանալ, թե այսօր ինչպիսի վտանգ է սպառնում Արսենի կյանքին:

-Ի՞նչ եք ակնկալում: Ինչպե՞ս եք տեսնում նրա մոտ հայտնաբերված հիվանդության բուժումը:

-Այս պահին միայն ազատ արձակում ենք ակնկալում, որպեսզի հնարավոր լինի համապատասխան բժշկական միջամտություն, արհեստավարժ մոտեցում ցուցաբերել: Արսեն Արծրունին Լիբանանի քաղաքացի է, եւ ազատվելու դեպքում անմիջապես Լիբանան պետք է տեղափոխվի՝ բժշկական անհրաժեշտ օգնությունը ստանալու համար. նա պետք է ամբողջական հետազոտության ենթարկվի, եւ մենք ընտանիքով կապահովենք նրա բուժման լավագույն պայմանները: Լիբանանում նա կունենա ապաքինվելու ավելի նպաստավոր պայմաններ: Ես մեծ հավատ ունեմ, որ նույնիսկ քաղցկեղի դեպքում ազատության պայմաններում հնարավոր կլինի նրա կյանքը փրկել: Անմիջապես ազատումը բանտից մեր առաջին պայմանն է ու ակնկալիքը:

Հարցազրույցն ամբողջությամբ՝ սկզբնաղբյուր կայքում