Քաղաքագետ Թեւան Պողոսյանը կարծում է, որ Արցախյան հակամարտության կարգավորման տեսանկյունից գալիք՝ 2018թ.-ը կոչվելու է ընտրությունների տարի: «Մի կողմից, ունենալու ենք որոշակի ակտիվություններ հանդիպումների տեսքով, բայց Ռուսաստանում եւ Ադրբեջանում ընտրություններ են տեղի ունենալու: Այս ամենն ազդելու է տեմպերի վրա: Գուցե կլինեն ուղերձներ, բայց չեմ հավատում, որ իրականում առաջընթաց կունենանք»,-«Մեդիա կենտրոն»-ում այսօր լրագրողների հետ հանդիպման ասաց նա:
Թեւան Պողոսյանն ակնարկեց՝ պետք է պատրաստ լինենք տարբեր սրացումների. «Սպասումները պետք է միտված լինեն այն հարցադրմանը, թե որքանո՞վ ենք պատրաստ մեր շահերն առաջ տանել՝ առաջնագիծն ամրապնդել, տնտեսությունը զարգացնել»:
Անդրադառնալով Մերձավոր արեւելքում այս տարի տեղի ունեցած զարգացումներին՝ քաղաքագետն արձանագրեց, որ Հայաստանն ունակ չեղավ պահպանելու իր սփյուռքն Իրաքում եւ Սիրիայում. «Ապագայում էլ մեծ ուշադրություն պետք է դարձնել Երուսաղեմում եւ Լիբանանում հնարավոր զարգացումներին: Ցանկացած սրացում մեր վրա եւս ազդեցություն է ունենալու»:
Ինչ վերաբերում է նոյեմբերին ՀՀ-ի եւ ԵՄ-ի միջեւ ստորագրված համաձայնագրին՝ Պողոսյանի համոզմամբ. «ՀՀ-ին առաջիկա տարում պետք է վարի այնպիսի քաղաքականություն, որպեսզի ԵՄ բոլոր երկրները վավերացնեն համաձայնագիրը: Մեկ տարի հետո կարելի է խոսել արդյունքների մասին»:
Լուիզա ՍՈՒՔԻԱՍՅԱՆ
