Երեկ բանանի մեկ կիլոգրամ մանրածախ գինը Երեւանի մի շարք խանութներում 890-ից 1200 դրամ էր, ինչպես որ նախկինում էր: Վերջին մի քանի ամսվա համեմատությամբ բանանն այս օրերին 200-350 դրամով թանկացել է: Անկախ այն բանից, որ բանանի շուկայում ներկրողներն ավելանում են, ՊԵԿ-ն էլ հավաստիացնում է, որ բանանի մենաշնորհը «կոտրվել» է, այդուհանդերձ, ամենաթեթեւ առիթի դեպքում բանանը միանգամից մի քանի հարյուր դրամով թանկանում է: ՊԵԿ-ի տվյալներով՝ այսօր մեր երկրում մոտ 50 բանան ներկրող կազմակերպություն եւ անհատ կա:
Այսինքն` ստացվում է, որ նույնիսկ այդքան մրցակից ներկրողների պարագայում էլ մեր երկրում բանանի գինը չի նվազում: Ապրանքային այս շուկայի ուսումնասիրությամբ զբաղվող մասնագետները չեն բացառում, որ իրականում խոշոր ներկրողը շարունակում է մնալ միեւնույն սուբյեկտը, սակայն տարբեր ընկերությունների անուններով, ինչով էլ պայմանավորված՝ բանանի բարձր գինը պահպանվում է, հակառակ դեպքում այդքան ընկերությունների առկայությունը պետք է որ բերեր առողջ մրցակցության, ինչի արդյունքում էլ բանանն անպայման էժանանալու էր:
Եթե ոչ, ուրեմն այդ տնտեսվարողներից խոշորները, որոնք որ շուկայում եղանակ են ստեղծում, եկել են հակամրցակցային համաձայնության եւ, Ամանորով պայմանավորված, բանանի գինը բարձրացրել են: Ի դեպ, կառավարության վերջին նիստին վարչապետ Կարեն Կարապետյանը ՏՄՊՊՀ ղեկավարին առաջարկեց Ամանորին ընդառաջ խստացնել վերահսկողությունը գերիշխող ապրանքային շուկաներում՝ գների անհիմն բարձրացումներից խուսափելու համար:
Լուսանկարը` ԼՈՒՍԻՆԵ ԲՈՒԴԱՂՅԱՆԻ
«Առավոտ»
27.12..2017
