ՀՀ վարչական դատարանն այսօր դատավոր Կարինե Բաղդասարյանի նախագահությամբ մերժեց «Սասնա ծռերի» գործով ամբաստանյալ, «Հիմնադիր խորհրդարան» ընդդիմադիր շարժման ներկայացուցիչ Վարուժան Ավետիսյանի հայցն ընդդեմ ոստիկանության:
Վարուժան Ավետիսյանը պահանջում է ոչ իրավաչափ ճանաչել ոստիկանների գործողությունները`2015թ.( 2016թ) դեկտեմբերի 31-ի գիշերը, Ազատության հրապարակում քաղաքացիների հավաքի ժամանակ, որը կազմակերպել է ինքը: Հիշեցնենք, այդ օրն ընդդիմադիրները փորձում էին Ազատության հրապարակում այլընտրանքային տոնածառ տեղադրել: Ոստիկանությունը թույլ չտվեց: Քաղաքացիական ակտիվիստ Գեւորգ Սաֆարյանը սույն գործով դատապարտվեց երկու տարի ազատազրկման:
Գեւորգ Սաֆարյանի շահերի պաշտպան Տիգրան Հայրապետյանի համար զարմանալի չէ դատարանի այս որոշումը: Ասում է`դատավորը նախապես իր դիրքորոշումը հայտնել էր: Նկատի ունի այն, որ հայցադիմումն ընդունելու հարցի քննարկման ժամանակ դատավորն ասել էր, որ ոստիկանների գործողություններում ոչ իրավաչափություն չկա:
Տիգրան Հայրապետյանն ասում է դիմելու ենք ՄԻԵԴ: Այդ պատճառով էլ համբերատար անցնում են հայաստանյան դատական ատյաններով, որպեսզի ՄԻԵԴ-ում ՀՀ կառավարությունը չասի`ոստիկանների գործողությունները չեն վիճարկվել:
Պաշտպանը նկատում է`Գեւորգ Սաֆարյանի բոլոր իրավունքները խախտվել են: Իր համար հետաքրքիրն այն է, թե ինչպիսի՞ հիմնավորումներով են մերժել: Դա հստակ կլինի, երբ որոշման գրավոր օրինակը կստանա: «Ոստիկանություն, ըստ էության, ընդունեց, որ տոնածառ չդնելու մասին որոշում չի եղել ոչ մի պատկան ատյանի կողմից: Դատարանն էլ տեսավ տեսանյութը`թե ինչպե՞ս են ոստիկանները ծեծում քաղաքացիներին: Եթե սա պետք է իրավաչափ համարի`սա դատարան է, թե՞…»,- ասաց Տիգրան Հայրապետյանը:
Նելլի ԳՐԻԳՈՐՅԱՆ
