Aravot.am-ն Արցախի հերոս, լեգենդար գեներալ-մայոր Արկադի Տեր-Թադևոսյանից՝ Կոմանդոսից հետաքրքրվեց, թե մեր երկրին ի՞նչ է տալիս Հավաքական անվտանգության պայմանագրի կազմակերպությանն անդամակցելը։ «Այն տվեց, որ մենք գոյատևում ենք, մեր սահմաններում Ադրբեջանի ու Թուրքիայի հետ ո՞վ է կանգնած, մեր ուժերը չէ՞ ՀԱՊԿ-ի, Ռուսաստանի զորքերն են կանգնած։ Ես, իհարկե, հասկանում եմ ձեր հարցի ենթատեքստը, վերջերս մի քանի պրոբլեմներ եղան, բայց այդ պրոբլեմները գլխավոր չեն, գլխավորն այն է, որ այդ ուժերը կան ու կզարգանան կամաց-կամաց։ Մի պետությունը, մի ազգը չի կարող մենակ գոյատևել, ինքը պետք է մի տեղ, մի թիմի մեջ լինի։ Մենք հիմա այն թիմի մեջ ենք, որ կարող ենք ասել՝ զարգանում է, ուժեղանում է, տարեցտարի այն նպատակը, որ իր առջև դրված է, կկատարի»,- ասաց գեներալը։
Մեր հաջորդ հարցին՝ ինչպե՞ս հասկանալ Հայաստանի Հանրապետությանը ռազմավարական դաշնակից համարվող Ռուսաստանի Դաշնության կողմից Ադրբեջանին զենք վաճառելը, Կոմանդոսն ասաց. «Բերեք մենք ուրիշի գործողությունները չքննադատենք։ Իհարկե, շատ ցավալի է, ու այդ մասին մեր պրեզիդենտը, մեր պատգամավորներն ու շատերն են ասել, բայց բերեք հասկանանք՝ այդ քայլերը, որ Ռուսաստանն անում է, ինքն իր քաղաքականությունն ունի, իր ծրագիրն ունի…Այդ գործողություններն անում է, որոնք մենք մեկ-մեկ չենք հասկանում։ Հիմա Ուկրաինային կես միլիարդի զենք են տալիս, գիտենք, որ Պուտինն ասաց՝ որտեղ որ պրոբլեմ կա, չի կարելի զենք գնել, բայց ինքը… Դրա համար, ոչինչ, պետք է հասկանանք, որ դա գլխավոր հարցը չէ, գլխավոր հարցն այն է, որ մենք կազմակերպության մեջ ենք»։
Նունե ԱՐԵՎՇԱՏՅԱՆ
