Ոստիկանության ՊՊԾ գունդը գրաված եւ մի շարք ծանր հանցագործությունների մեջ մեղադրվող «Սասնա ծռեր» խմբի անդամների գործով այսօրվա նիստում ամբաստանյալներից Մարտիրոս Հակոբյանի՝ «Դեդ»-ի եւ դատախազների միջեւ լեզվակռվից հետո Հակոբյանի շահերի պաշտպան, փաստաբան Մուշեղ Շուշանյանը միջնորդեց նիստերի դահլիճ վերադարձնել Հակոբյանին:
Մյուս պաշտպաններն ու ամբաստանյալները միացան միջնորդությանը, որի առնչությամբ ամբաստանյալներից Վարդան Գերավետյանը հայտարարություն արեց. «Նախորդ նիստում դատախազը Մարտիրոս Հակոբյանին «թուրք» անվանեց: Նա այդ նույն թուրքի դեմ է կռվել ու մեծ արժանիքներ ունի, ինչը դուք չունեք: Ձեր պես դատարանը ժամանակին Նժդեհին դատում էր հայրենասիրության համար: Ամեն ինչ անում եք, որ Ադրբեջանը հրճվի, որ այստեղ Արցախյան պատերազմի հերոսներին են դատում»,-դիմելով դատախազներին՝ ասաց նա:
Դատախազներից Արթուր Չախոյանն էլ իր հերթին ասաց, որ իրենց կողմից երբեւէ դատական նիստը խափանելուն ուղղված քայլեր չեն կատարվել, մինչդեռ Մարտիրոս Հակոբյանը խախտել է դատական նիստի կարգը, հետեւաբար՝ նրա հանդեպ կիրառված սանկցիան իրավաչափ է: «Անաչառ դիտորդի համար էլ է պարզ, որ Հակոբյանն անհարգալից վերաբերմունք դրսեւորեց դատարանի հանդեպ: Պաշտպանական կողմը երբեւէ չի նկատում ամբաստանյալների անհարգալից վերաբերմունքը»,-ընդգծեց դատախազը:
Ի վերջո, դատավոր Արթուր Օհանյանը որոշեց «Դեդ»-ին նիստերի դահլիճ վերադարձնելու միջնորդությունը մերժել. «Միաժամանակ, կարգի եմ հրավիրում դատավարության բոլոր մասնակիցներին, մասնավորապես՝ դատախազներին, եւ նրանց հանդեպ նախազգուշացում եմ հայտարարում»:
Լուիզա ՍՈՒՔԻԱՍՅԱՆ
