Ինչպես ավելի վաղ հայտնել էինք, Սարի թաղի գործով դատական նիստում այսօր որպես ցուցմունք տվեց ոստիկան Ռաֆայել Մանուկյանը: Հարցաքննության ավարտին ամբաստանյալների պաշտպաններից փաստաբան Գրիշա Բալասանյանը դատավոր Աննա Դանիբեկյանի ուշադրությունը հրավիրեց այն հանգամանքին, որ Մանուկյանի նախաքննական ցուցմունքում նրա բնակության հասցեն գրված է Խորենացի 162, որը Ոստիկանության Էրեբունու բաժնի շենքի հասցեն է:
Այս առնչությամբ վկան պարզաբանեց, որ գուցե տպագրական սխալ է եղել, ինքը չէր կարող այդ հասցեում բնակվել: Պաշտպանական կողմը, սակայն հիշեցրեց, որ նա ընթերցել է, նոր ստորագրել ցուցմունքի տակ:
«Այս գործով վկա-ոստիկանների ցուցմունքները գրեթե նույնն են եւ համակարգչով են հավաքված: Կարելի է ասել, որ «copy-paste» են արել, անգամ տառասխալներն են նույնը: Հնարավոր չէր, որ քննիչի մոտ ոստիկանները բառացի շարադրեին նույնը»,-հայտարարեց Գրիշա Բալասանյանը: Նա պնդեց, որ ցուցմունքները ոստիկանները չեն գրել, այլ գրել են իրենց փոխարեն, եւ դա է պատճառը, որ դատարանում հարցաքննվելիս նրանք գրեթե ոչինչ չեն հիշում ու հղում են անում իրենց նախաքննական ցուցմունքներին:
Պաշտպանական կողմի մյուս հարցերին ի պատասխան Ռաֆայել Մանուկյանը շարունակում էր ասել, որ չի հիշում մանրամասները, որովհետեւ ծանրաբեռնված է աշխատել: Սա զայրացրեց ամբաստանյալներից Անդրանիկ Քյոսեյանին, որն առանց դատավորի թույլտվության բղավեց. «Ձեր «ծանրաբեռնվածության» պատճառով 1,5 տարի է՝ նստած ենք»:
Ամբաստանյալն ու վկա-ոստիկանն իրար «արա՜»-ով դիմեցին, ինչից հետո Քյոսեյանը դատավորի կողմից արժանացավ սանկցիայի եւ հեռացվեց նիստերի դահլիճից մեկ ժամով:
Այս գործով հաջորդ նիստը կկայանա 2018թ. հունվարի 12-ին, ժամը 14:00-ին:
Լուիզա ՍՈՒՔԻԱՍՅԱՆ
