Արմավիրի մարզպետի խորհրդական Մանուկ Սիմոնյանի սպանության մեջ մեղադրվող կինը մեղսունակ է ճանաչվել, այս գործով նախաքննությունն ավարտին է մոտենում: Այս մասին Aravot.am-ին հայտնեց նրա պաշտպան՝ փաստաբան Նաիրա Պետրոսյանը:
Նրա խոսքով, արդեն ստացել են նաեւ իր պաշտպանյալի նկատմամբ նշանակված դատահոգեբուժական եւ դատահոգեբանական համալիր փորձաքննության պատասխանները. «Անպատասխան է մնացել շատ կարեւոր հարց հոգեբանական վիճակի վերաբերյալ, նորից միջնորդություն ենք ներկայացրել, որ որոշվի՝ ինչ հոգեվիճակում է գտնվել, նախաքննության ավարատական փուլում ենք»:
Ըստ փաստաբանի՝ համալիր փորձաքննության մասով իր պաշտպանյալը մեղսունակ է ճանաչվել. «Բայց կոնկրետ հոգեբանական մասով, փորձագետը չի պատասխանել՝ ինչ հոգեվիճակում է եղել իմ պաշտպանյալը դեպքի պահին: Ըստ գործի փաստական տվյալների եւ իմ պաշտպանյալի հոգեկան վիճակի՝ ակնհայտ է, որ դեպքը աֆեկտի վիճակում է կատարված, ու փորձագետը այս առումով որեւէ նշում չի կատարել»:
Եթե փորձագետն արձանագրի՝ կինը ամուսնուն սպանել է աֆեկտի վիճակում, ըստ փաստաբանի՝ իր պաշտպանյալն ավելի մեղմ պատասխանատվության կենթարկվի:
Հիշեցնենք, որ սպանվածի կնոջը մեղադրանք է առաջադրվել՝ ՀՀ քրեական օրենսգրքի 104-րդ հոդվածի 1-ին մասով՝ որպես խափանման միջոց ընտրելով կալանավորումը:
Փաստաբանը նաեւ հայտնեց, որ մարզպետի խորհրդականի սպանությանը նախորդել է բռնություն. «Տուժողի կողմից գործադրվել է բռնություն, ծաղրուծանակ, գործի նյութերով բոլորն արձանագրված է»:
Արփինե ՍԻՄՈՆՅԱՆ
