«Հայելի» ակումբում դեկտեմբերի 25-ին կայացած ասուլիսի ժամանակ Հայաստանի ազգային արխիվի տնօրեն Ամատունի Վիրաբյանը նշեց, որ 2017 թ. ընթացիկ աշխատանքից բացի, իրենց համար կարևոր էր արխիվային փաստաթղթերի մշակումը: Նրա ձեւակերպմամբ, հաճախորդների սպասարկումը նույնքան կարեւոր է եղել. «Այսօր առանց արխիվային տեղեկանքի Ռուսաստանի Դաշնությունում ոչ ոք չի կարող թոշակ ստանալ»: Նրա խոսքերով, այժմ ամեն ինչ դյուրացվել է, եւ քաղաքացին պատասխան է ստանում էլեկտրոնային ճանապարհով:
Պարոն Վիրաբյանն անդրադարձավ նաեւ հրատարակություններին, մասնավորապես` «Հայկական եկեղեցիների պատմական ուղին» գրքին: Վերջինս երկլեզու է` ռուսերեն և հայերեն, նվիրված է Նոր Նախիջեւանի պատմությանը:
Հայաստանի ազգային արխիվը մի քանի գիրք է նախապատրաստում, դրանցից մեկը նվիրված է Երեւանի պատմությանը:
Ամատունի Վիրաբյանը խոսեց նաեւ համալրումների մասին: «Այս տարի ընդունեցինք ՀՀ առաջին նախագահ Լեւոն Տեր-Պետրոսյանի փաստաթղթերը, աշխատանք ենք տանում ընդունելու նաեւ ՀՀ երկրորդ նախագահ Ռոբերտ Քոչարյանի փաստաթղթերը 98-2008 թթ., ընդունել ենք առաջին եւ երկրորդ Ազգային ժողովների փաստաթղթերը, կառավարության ամբողջ արխիվը տեղափոխվել է Հայաստանի ազգային արխիվ: Բացառությամբ ՊՆ-ի, ԱԳՆ-ի եւ ԱԱԾ-ի, բոլոր պետական մարմիններն իրենց փաստաթղթերը հանձնում են մեզ»,-հայտնեց Ամատունի Վիրաբյանը:
Գոհար ՀԱԿՈԲՅԱՆ
Լուսանկարը՝ «Ա1+»-ի
