Այսօր հրավիրված տարեվերջյան աշխատանքային խորհրդակցության ժամանակ Լոռու մարզպետ Արթուր Նալբանդյանն անդրադարձավ աղբահանության ու սանիտարական մաքրման ուղղությամբ մարզում իրականացվող աշխատանքների կանոնակարգմանը: Նա մարզպետարանի ստորաբաժանումների ղեկավարներին եւ պատասխանատու պաշտոնյաներին հորդորեց, այսուհետ այլ տուրքերի հավաքագրման հետ միասին ուշադրություն դարձնել նաեւ աղբավճարների հավաքագրմանը:
«Ինչպես սեփական եկամուտների, այնպես էլ աղբավճարների հավաքագրումը պետք է դրվի ՏԻՄ-ի, փոխմարզպետները՝ իրենց տարածքների եւ ֆինանսական վարչության վրա, որը պետք է փոխմարզպետներին եւ ՏԻՄ-ին պարբերաբար հաշվետվություն ներկայացնի: Իսկ աղբավայրի բնապահպանական ու քաղաքաշինական նորմատիվների մասով կզբաղվի քաղաքաշինությունը: Ունենք մի քանի հոդվածներ, որ պարբերաբար ուշադրություն ենք դարձնում, ավելացնում ենք նաեւ աղբավճարների հավաքագրումը՝ ըստ համայնքների: Համայնքը բյուջեով ինչքան է նախատեսել, եւ ըստ այդ տարիների կազմում ենք ժամանակացույց: Տեղական տուրք, հողի հարկ եւ այլն ուշադիր ենք լինում, նույնն էլ աղբահանությունն է»,- ասաց Արթուր Նալբանդյանը:
Սեփական եկամուտների հավաքագրումը շարունակում է մնալ մարզի ցավոտ հարցերից մեկը: Ֆինանսական եւ սոցիալ-տնտեսական զարգացման վարչության պետ Հրայր Պապոյանը տեղեկացրեց, որ դեկտեմբերի 22-ի դրությամբ սեփական եկամուտների հավաքագրումը կազմել է 205 մլն 735 հազ. դրամ: Մարզը տարեկան պլանից հետ է 120 մլն 229 հազ դրամ, հողի հարկի գծով՝ 58 մլն 125 հազ. դրամ, գույքահարկի մասով՝ 19 մլն 453 հազ. դրամ, իսկ տեղական տուրքերի մասով հետ է մնում 2 մլն 812 հազ. դրամով:
«Հիմնական որպես խնդրահարույց համայնքներ կարելի է առանձնացնել Շիրակամուտ համայնքը, որն այս պահի դրությամբ 2 մլն 917 հազ. դրամի պարտք ունի, Սարամեջ, Սարհարթ, Նոր խաչակապ համայնքները: Տաշիրում՝ Տաշիր, Մեծավան եւ Սարչապետ համայնքները, Թումանյանի տարածաշրջանում հիմնական խնդիրը կայանում է 3 համայնքների մեջ՝ Ախթալան 7 մլն, Ալավերդին՝ 10 մլն դրամ եւ Օձուն համայնքը՝ 8 մլն դրամ: Ստեփանավանի տարածաշրջանում հետ ենք 19 մլն 811 հզ դրամով, որից Ստեփանավան համայնքը՝ 5 մլն 600 հազ. դրամ, Գյուլագարակը՝ 7 մլն 400 հազ, Լոռի բերդը՝ 6 մլն 740 հազ»,- տեղեկացրեց Հրայր Պապոյանը:
Խորհրդակցության ավարտին մարզի ղեկավարը առողջապահության ու սոցիալական ապահովության վարչությանը հանձնարարեց տոնական օրերին վերահսկել առողջապահական հիմնարկների կողմից իրականացվելիք հերթապահությունը:
«Տոնական օրերին ստացիոնար եւ ամբուլատոր հատվածներում, շտապօգնության ծառայությունում առավել որակյալ մասնագետների հերթապահություն կկազմակերպվի: Ամբուլատոր հատվածի հետ կապված տնային հերթապահություն է նշանակվել»,- տեղեկացրեց վարչության պետ Սամվել Լամբարյանը:
Տաթեւիկ ՂԱԶԱՐՅԱՆ
