2018թ.-ին Հայաստանը տեղական արտադրության շնորհիվ կկարողանա 70%-ով բավարարել բրոյլեր-հավերի պահանջարկը: Իսկ ահա ածան-հավերի խնդիրը դեռեւս առկա է. արտադրություն չկա, ներկրում ենք: Այս մասին այսօր «Տեսակետ» մամուլի ակումբում լրագրողների հետ հանդիպմանն ասաց «Թռչնաբույծների միություն» հ/կ նախագահ Սերգեյ Ստեփանյանը:
Նա անդրադարձավ սպառողների ահազանգերին առ այն, որ շուկայում վաճառվում է հակաբիոտիկներ պարունակող թռչնամիս: Վստահեցրեց, որ հայ թռչնաբույծները ոչ մի կերային հակաբիոտիկներ չեն օգտագործում. «Թող սպառողները համոզված լինեն դրանում: Հակաբիոտիկներ օգտագործում են միայն դեղորայքի ձեւով՝ բուժման նպատակով: Մենք հորմոնալ խթանիչներ եւս չենք օգտագործվում, դա շատ թանկ հաճույք է: Անգամ աշխատում ենք կերային ծագում ունեցող սպիտակուցներից խուսափել եւ օգտագործել հիմնականում բուսական ծագման կերեր»:
Թե ինչպես է նման թռչնամիսը հայտնվել հայաստանյան շուկայում, Ստեփանյանը չի կասկածում՝ ներմուծման հետեւանք է. «Թռչնամսի շուկան մրցունակ է դարձել: Արդեն հինգ տարի՝ տարեկան 4-5 տոկոսով թռչնամսի արտադրության աճ ենք գրանցում: Հայ արտադրողները տալիս են թարմ միս, որը 3-5 օր պահպանվում է սառնարանում: Այլ է հարցը, որ ներկրողները բերում են էժան եւ վտանգավոր թռչնամիս»:
Լուիզա ՍՈՒՔԻԱՍՅԱՆ
