Դեկտեմբերի 22-ին Նոյեմբերյան քաղաքի հանդիսությունների սրահներից մեկում կայացել է Նոյեմբերյանի տարածաշրջանի Զորական գյուղի բնակիչ Վլադիմիր Մովսիսյանի հարսանիքը: Փեսացուն 2016թ. ապրիլի 30-ին Թալիշում հերոսաբար զոհված 19-ամյա Գարիկ Մովսիսյանի եղբայրն է:
Զորականի վարչական ղեկավար Սուրեն Մարտիրոսյանը հայտնեց, որ Մովսիսյանների քույրը`Գայանեն մանուկ հասակում մահացել է տանը կարմիր բիբարի պահածո օգտագործելու հետեւանքով, բուտուլիզմ հիվանդությունից: Զորականում, որը նախկինում ադրբեջանաբնակ գյուղ է եղել, բնակվում են Դաշտային Ղարաբաղի հռչակավոր Չարդախլու գյուղից վերաբնակվածները: 2016թ. մայիսի 2-ին Գարիկ Մովսիսյանի հուղարկավորության արարողության մասնակիցները տեսել էին, որ շատ վատ պայմաններում, հողաշեն, խարխուլ տանն է ապրում Մովսիսյան ընտանիքը:
Պետական բյուջեի միջոցներով Մովսիսյանների համար նոր առանձնատան կառուցման գործը ստանձնել է այդ ժամանակ վարչապետ պաշտոնավարած Հովիկ Աբրահամյանը, ում նաեւ ընտանիքի քավորի պատիվն ու պարտականությունն է տրվել: Նա որպես քավոր նվեր է բերել նորապսակներին, նաեւ խոստացել հոգալ հարսանիքի հետ կապված ծախսերը:
Նոյեմբերյանում կայացած հարսանիքին, զորականցիների հրավերով, մասնակցել է նաեւ Տավուշի մարզպետ Հովիկ Աբովյանը:
Ոսկան ՍԱՐԳՍՅԱՆ
Հալալ է Աբովյան Հովիկին, որ անկախ ամեն ինչից ընկերություն է անում Հովիկ Աբովյանի հետ։