Այս տարվա վերջին տասը ամսում ՀՀ-ում թռչնամթերքի արտադրության ծավալները չեն նվազել, իսկ ահա ձվի արտադրությունը նոյեմբերին նախատեսված քանակի չեղավ: Այս մասին այսօր «Տեսակետ» մամուլի ակումբում լրագրողներին հայտնեց «Թռչնաբույծների միություն» հ/կ նախագահ Սերգեյ Ստեփանյանը: Նա նշեց, որ ձվի պահանջարկ եղավ, որովհետեւ այս տարի երկու անգամ թռչնագրիպրի տարածքային կարանտին է անցկացվել, եւ համապատասխան թվաքանակով ածան հավեր չեն ներկրվել:
«Այդ պատճառով էլ ձվի ներկրում տեղի ունեցավ, որպեսզի շուկայի պահանջարկը բավարարվի: Այսօրվա դրությամբ 5,2 միլիոն հավկիթ է արդեն ներկրվել, ուստի նախատոնական առեւտուրն առանց պակասորդի կարող է իրականացվել: Դժվար ժամանակաշրջանը հաղթահարված է»,-վստահեցրեց Ստեփանյանը:
Նրա խոսքով՝ ձվի գնի փոփոխություն եղել է այս տարվա հոկտեմբերին՝ 2-3 դրամ թանկացում. «Վերջերս գնի փոփոխություն չի եղել, միայն տուփերով ձվի եւ տնական ձվի գինն է 4 դրամով բարձրացել՝ դառնալով հատը 80-100 դրամ: Մյուս ձվերը խանութներում վաճառվում են 65, 70, 75 դրամով»:
Անդրադառնալով մամուլում առկա տեղեկություններին, որ խանութներում ձուն արդեն հատը նույնիսկ 100 դրամով է վաճառվում, Սերգեյ Ստեփանյանը պնդեց վերոնշյալը՝ տեղական արտադրողների ձուն չի թանկացել, այլ է հարցը, որ խանութներն իրենք են գինը բարձրացնում տոներին ընդառաջ:
Լուիզա ՍՈՒՔԻԱՍՅԱՆ
