ՀՀ-ում Բելառուսի դեսպան Իգոր Նազարուկը դրական է համարում այն, որ ԵԱՏՄ շրջանակներում ազատականացվում են շուկաները: Այդ մասին նա ասաց այսօր, Եվրասիական փորձագիտական ակումբի չորրորդ ամենամյա «ԵԱՏՄ երեք տարին. Նվաճումներ եւ հեռանկարներ» թեմայով համաժողովի ժամանակ: Դեսպանն ընդգծեց տրանսպորտի եւ դեղերի շուկաներում իրականացվող դրական աշխատանքները: Նաեւ այն, որ ջանքեր են գործադրվում միասնական արտադրանքների արտադրության ոլորտում: 2017-ի տնտեսական ցուցանիշներն իրեն հուսադրող են թվում:
Բայց նկատում է. «Այս թվերը կարող էին անհամեմատ ավելին լինել, եթե որոշ երկրներ չզգային իրենց վրա պատժամիջոցների բացասական ազդեցությունը, որոնք կիրառում են իրենց «համայն աշխարհի ուժեղներ» անվանող երկրները»: 2017-ին Բելառուսի ապրանքաշրջանառությունը ԵԱՏՄ անդամ երկրների հետ, աճել է 27 տոկոս: Նկատում է, որ գյուղատնտեսական ապրանքների արտահանման ոլորտում Հայաստանն առաջ է անցել Բելառուսից: Ամեն դեպքում, դեսպանը փաստում է`ԵԱՏՄ-ն կայացել է եւ նրա շինարարությունը 2018-ին ավելի դրական արդյունքներ կամրագրի: Նա նոր տարր է համարում ՀՀ-ի եւ ԵՄ-ի միջեւ համաձայնագրի ստորագրումը: Կարծում է, որ սա կարող է ԵԱՏՄ-ի հետ համագործակցությունների հարթակ դառնալ:
ՀՀ-ում Ղազախստանի դեսպան Թիմուր Ուրազաեւն էլ նկատեց`չնայած բոլոր խոչընդոտներին, ԵԱՏՄ անդամ բոլոր երկրները ընդգծում են զարգացման դրական դինամիկան: «Ամենալավ տվյալները Հայաստանինն են, թե 2016-ին, թե 2017-ի դեռ վերջնական չամփոփված տվյալներով: Խոսքն արտահանման դրական դինամիկայի մասին է, թե ԵԱՏՄ երկրներ, թե երրորդ երկրներ»,- ասաց դեսպանը:
Նա նկատեց`Հայաստանում IT ոլորտը բավական աչքի է ընկնում, դեռ խորհրդային տարիներ էլ դա ակնհայտ էր: Ասաց`սա պետք է զարգացնել, այն կարող է տնտեսությունների զարգացման առաջատարը դառնալ: Ըստ դեսպանի, այս հարցում Բելառուս եւ ՀՀ-ի միջեւ մրցակցություն կա. «Տնտեսության թվայնացման լոկոմոտիվի դերն իր վրա է վերցրել Բելառուսը, բայց անկեղծ խոսենք, Հայաստանում լավ պոտենցիալ կա»:
Դեսպանը կարծում է, որ անկեղծությունը պետք է լինի ԵԱՏՄ-ում համագործակցության հիմքը, միմյանցից չպետք է հարկեր թաքցնենք, անգամ եթե շատ մանր բաների մասին է խոսքը. «Փոքր սուտը կարող է անվստահություն առաջացնել»: Նաեւ հավելում է` ԵԱՏՄ-ում քաղաքականությունը պետք է լինին նվազագույն. «Սա մեր դիրքորոշումն է: Քաղաքականությամբ մարդկանց չես կերակրի, աշխատավարձ չես բարձրացնի, դա ընդամենը գործիք է տնտեսական հնարավորությունները առավելագույնի հասցնելու համար»: Ղազախստանը մնում է իր դիրքորոշմանը`տնտեսությունների ինտեգրումը մեկ, միասնական տնտեսության մեջ:
ՀՀ-ում ՌԴ դեսպանի խորհրդական Ալեքսանդր Վասիլեւի համար էլ անսպասելի, նույնիսկ զարմանալի են Հայաստանի ամփոփիչ արդյունքները: Վերամշակող արդյունաբերության ոլորտում դրական տեղաշարժեր կան, տեղեկատվական տեխնոլոգիաների ոլորտում են ակնկալում զարգացումներ: Ասում է`Հայաստանի օրինակը պետք է մյուս երկրների համար փորձ լինի, թե ինչպես կարելի է մոբիլիզացնել հնարավորությունները:
Ի դեպ, միջոցառման ժամանակ հայաստանյան մի շարք լրատվամիջոցներ, այդ թվում նաեւ «Առավոտը», եւ լրագրողներ պարգեւատրվեցին Եվրասիական տնտեսական ակումբի կողմից շնորհակալագրերով`ԵԱՏՄ-ի գործունեությունը բազմակողմանի լուսաբանելու համար: Ակումբը համալրվեց նոր անդամներով:
Նելլի ԳՐԻԳՈՐՅԱՆ
