«Օլիմպավանում» բռնցքամարտի ազգային հավաքականի անդամներ Արամ Ավագյանը, Նարեկ Աբգարյանը եւ Գոռ Երիցյանը հավաքականի գլխավոր մարզիչ Դավիթ Թորոսյանի հետ միասին հանդիպեցին լրագրողներին:
Այս բռնցքամարտիկները Ռիոյի օլիմպիական խաղերից հետո հավաքականի կազմում հանդես գալուն զուգահեռ կարիերա են սկսել նաեւ պրոֆեսիոնալ ռինգում, որտեղ հասցրել են առաջին հաջողությունները գրանցել: Նրանք միասին անցկացրել են տասնյոթ մենամարտ եւ բոլորում էլ հաղթել են: Հատկանշական է, որ նրանք այդ մարտերից միայն չորսում են միավորներով հաղթել, մյուսներն ավարտվել են նոկաուտով:
Ավագյանը, Երիցյանը եւ Աբգարյանը հետագայում էլ շարունակելու են համադրել սիրողական եւ պրոֆեսիոնալ բռնցքամարտերը՝ հաշվի առնելով, որ AIBA-ն թույլատրել է բռնցքամարտիկներին համատեղել երկու ռինգերը: Պրոֆեսիոնալ բռնցքամարտն օլիմպիական խաղերի ուղեգիր նվաճելու ճանապարհներից մեկն է դարձել: Այդ պատճառով էլ նրանք շատ են աշխատելու լավ մարզավիճակ ձեռք բերելու եւ 2019 թվականին նաեւ այդ ճանապարհով Տոկիո-2020-ի ուղեգիր նվաճելու համար:
Լրագրողների խնդրանքով բռնցքամարտիկներն առանձին-առանձին խոսեցին իրենց պրոֆեսիոնալ կարիերայի մասին:
Արամ Ավագյան (6 հաղթանակ՝ 4-ը նոկաուտով). «Վերջին մենամարտից առաջ Ծաղկաձորում հավաք անցկացրինք: Հասցրեցի լավ պատրաստվել, ռինգում կիրառեցի մարզչիս խորհուրդները եւ ժամանակից շուտ հաղթանակով ավարտեցի մարտը: Ապագայի պլանների մասին հստակ ոչինչ չեմ կարող խոսել, ամեն ինչ դեռ քննարկման փուլում է: Երբ պարզ դառնա, կհայտնեմ լրագրողներին»:
Գոռ Երիցյան (4 հաղթանակ, բոլորը՝ նոկաուտով). «Վերջին մրցակիցս Վրաստանի ներկայացուցիչն էր: Լավ տրամադրված էի մենամարտին եւ հասա անհրաժեշտ արդյունքին: Այնուհետեւ հավաքականի կազմով մեկնեցինք Լեհաստան՝ մասնակցելու սիրողական մրցաշարի, որտեղ եւս բարձր մակարդակով հանդես եկանք: Ոչ մեծ հանգստից հետո այժմ շարունակում ենք մարզվել: Ապագա մենամարտի հետ կապված ես նույնպես չեմ տիրապետում հստակ ինֆորմացիայի»:
Նարեկ Աբգարյան (7 հաղթանակ՝ 5-ը նոկաուտով). «Աստիճանաբար պետք է ավելի ուժեղ մրցակիցների դեմ պայքարենք: Փետրվարի 10-ին մենամարտ ունեմ ԱՄՆ-ն ներկայացնող լուրջ բռնցքամարտիկի հետ, որն ունեցել է 8 հաղթանակ, 2 պարտություն եւ մայրցամաքային վարկածներից մեկի չեմպիոնական գոտի: Շատ մանրակրկիտ պետք է պատրաստվեմ այդ մենամարտին»:
Արամ Ավագյանի, Նարեկ Աբգարյանի եւ Գոռ Երիցյանի գործերով պրոֆեսիոնալ ռինգում զբաղվում է ռուսական «Punch Boxing Promotions» կազմակերպությունը, որը գլխավորում է մեր հայրենակից Արամ Դավթյանը:
ԱՇՈՏ ՀԱԿՈԲՅԱՆ
«Առավոտ»
22.12..2017
