«Հայ-իրանական սահմանում ռուս սահմանապահները կանգնած են բավականին երկար ժամանակ, ինչո՞ւ հենց հիմա ռուսները որոշեցին ցույց տալ, որ սահմանի տերն իրենք են»,-«Հիմնադիր խորհրդարան» ընդդիմադիր շարժման գրասենյակում այսօր կազմակերպված քննարկման ժամանակ անդրադառնալով փաստին, որ ՌԴ սահմանապահներն արգելել են Մեղրիի հատվածում ճանապարհաշինարարության իրականացումը՝ ասաց քաղաքագետ Ստեփան Սաֆարյանը:
Նրա բնորոշմամբ՝ սահմանի այդ հատվածում պարբերաբար ճանապարհների վերակառուցում արվել է, բայց ռուսներն իրենց մասին զգացնել չեն տվել. «Իրականում սա ուղերձ էր Իրանին՝ պայմանավորված Մեղրիում ազատ տնտեսական գոտու գործարկմամբ: Ռուսաստանը ցույց տվեց՝ եթե Իրանը մտածում է, որ ՀՀ-ին որպես ինքնիշխան հարեւան ունի, ապա այդպես չէ, սահմանի տերն ինքը՝ Ռուսաստանն է»:
Քաղաքագետը փաստեց՝ ՀՀ իշխանություններն ամրապնդել են տեսակետը, թե առանց Ռուսաստանի ՀՀ-ն ոչինչ չի կարող, այդ թվում՝ սեփական սահմանները պահել. «Խնդրի լուծումը Ռուսաստանի հետ պայմանագրերի վերանայման գործընթացը մեկնարկելն է: Մեր հասարակությանը «ներարկել» են, թե առանց որեւէ մեկի չենք կարող ոչինչ անել: Պետք է ճեղքել այդ արատավոր մտածելակերպը»:
Լուիզա ՍՈՒՔԻԱՍՅԱՆ
