Ի հեճուկս մեծամասնության, ՄԱՀՀԻ փորձագետ Արմեն Վարդանյանը չի կարծում, որ եկող տարի սպասվող նախագահական ընտրություններում հաղթանակից հետո ՌԴ նախագահ Վլադիմիր Պուտինին հանգիստ օրեր են սպասվում: Նա կարծում է, որ հետընտրական զարգացումները կխափանեն Պուտինի եւ ՌԴ-ի անդորրը: 2018-ին քաղաքագետը զարգացումներ չի կանխատեսում նաեւ Արցախի հարցում`պայմանավորված ՌԴ-ում եւ Ադրբեջանում սպասվող նախագահական ընտրություններով:
Այսօր Միջազգային եւ անվտանգության հայկական հարցերի ինստիտուտի կազմակերպած «2017-ի իրական եւ 2018-ի սպասվող Հայաստանը. անցյալի իներցիա՞, թե՞ փոփոխությունների մեկնարկ» թեմայով քննարկման ժամանակ, փորձագետն անդրադարձավ նաեւ արտաքին քաղաքական այլ հարցերի: Մասնավորաբար, նկատեց, որ ԱՄՆ նոր նախագահի վարչակազմը կոշտացրեց քաղաքականությունը Իրանի եւ Մերձավոր Արեւելքի որոշ երկրների հետ, ԱՄՆ-ի եւ նրա ավանդական դաշնակից ԵՄ-ի միջեւ բավական անհարթություններ կան. տարաձայնություններ կան ՆԱՏՕ-ի ռազմական բյուջեի ավելացման, Երուսաղեմի, Իրանի միջուկային համաձայնագրի հարցերում: Նա կարծում է, որ այս հակամարտությունները առաջիկայում նոր ընթացք կստանան:
Կարեւոր է համարում Ֆրանսիայում նոր նախագահի` Էմանուել Մակրոնի ընտրությունը: Նկատում է` կտրուկ քաղաքականություն է վարում: «Ես կարծում եմ, որ մոտ ապագայում Ֆրանսիան ավելի ակտիվ կլինի ԵԱՀԿ Մինսկի խմբում»,- ասաց նա:
Փորձագետի գնահատմամբ՝ կարեւոր էին նաեւ Կատալոնիայի հանրաքվեի շուրջ զարգացումները, ՀՀ-Իրան կապերը, փոխայցելությունները: Դրական է համարում, որ Իրանի եւ Հայաստանի միջեւ ապրանքաշրջանառությունը 10 տոկոս է: Չափազանց դրական է համարում Իրան-Հայաստան ազատ առեւտրի գոտու բացումը: Հույս ունի, որ Իրանի եւ ԵԱՏՄ-ի միջեւ էլ կստորագրվի ազատ առեւտրի գոտու համաձայնագիր եւ այդ կառույցից վերջապես մի օգուտ կլինի Հայաստանի համար:
Այլ մանրամասները`տեսանյութում
Նելլի ԳՐԻԳՈՐՅԱՆ
