«Հայաստանի ազգային կինոկենտրոնը որդեգրել է հստակ չափորոշիչներ, թե ինչպես պետք է նախագծեր ներկայացվեն: Թե նախկինում կամ 2015-16 թթ. ինչ նախագծեր են եղել, ինչպես են դիմել, հիմա արդեն այդ նախագծերը չեն համապատասխանում այսօրվա չափորոշիչներին, որոնք մենք նախանշել ենք: Ուրեմն պետք է վերարժեւորել նախագիծը, վերագնահատել, համապատասխանեցնել այն չափորոշիչներին, որ պահանջում է կինոկենտրոնը, ու նորից դիմել»,-դեկտեմբերի 22-ին հրավիրված ասուլիսում հայտարարեց ՀՀ մշակույթի նախարար Արմեն Ամիրյանն` անդրադառնալով կինոյի մարդկանց` կինոկենտրոնի վերաբերյալ դժգոհություններին:
«Գործընթացն այսպիսին է, առաջին փուլում տեխնիկապես ուսումնասիրվում է, թե ներկայացված նախագծերը որքանով են համապատասխանում մեր նախանշած պայմաններին, դրանից հետո գեղարվեստական խորհուրդը քննում է գեղարվեստական մասը, հետո նոր որոշում է կայացվում աջակցելու վերաբերյալ»,-շարունակեց նախարարը:
Հիշեցնենք, որ Aravot.am-ի հետ զրույցում ռեժիսոր Դավիթ Մաթեւոսյանը փնթի էր որակել կինոկենտրոնի աշխատաոճը, նաեւ բարձրաձայնել իր «Ալպիական մանուշակ» եւ «Պատիժ» նախագծերի ճակատագրերի անորոշության մասին:
Գոհար ՀԱԿՈԲՅԱՆ
