Գյումրու «Կումայրի» արգելոցի տարածքում գտնվող Հովհաննես Շիրազի անվան փողոցի վերանորոգման համար նվազագույնն անհրաժեշտ է 352 միլիոն դրամ։
«Արդեն ունենք Շիրազի փողոցի նախագիծը, շուտով կհայտարարենք մրցույթ, վերջնական ֆինանսավորման հետ կապված պայմանավորվածություն է ձեռք բերվում երևի համաշխարհային բանկի հետ։ Իհարկե, այս տեղեկությունն առայժմ չէի ուզենա հրապարակել, բայց․․․ Եթե նույնիսկ չեղավ, մենք պետք է անպայման կարողանանք ֆինանսավորում գտնենք, մեր կառավարությունը կմտածի ինչ-որ տեղից ֆինանսավորելու։
Մոտավորապես միայն Շիրազի փողոցը 352 միլիոն ենք հաշվել էս պահին՝ առանց երթևեկության նշանների և ինչ-որ կահավորանքների, որովհետև պետք է լինի կարմիր ասֆալտ։ Հիմա ման ենք գալիս համապատասխան կազմակերպություններ, որոնք պետք է անեն»,-այսօր իր տարեվերջյան հաշվետու ասուլիսի ժամանակ հայտնեց քաղաքապետ Սամվել Բալասանյանը։
Հիշեցնենք, որ Հովհաննես Շիրազի անվան փողոցը «Կումայրի արգելոցի» տարածքում է և այն մտադրված են վերանորոգել վարչապետ Կարեն Կարապետյանի՝ քաղաքի պատմական կենտրոնում տուրիզմը զարգացնելու ծրագրով։
Նունե ԱՐԵՎՇԱՏՅԱՆ
