«Ընդհանուր առմամբ շատ հաջողված բյուջեի նախագիծ ունենք, որը թույլ է տալու ապահովել պլանավորած ՀՆԱ-ի աճը, իրականացնելու է բազմաթիվ ծրագրեր` երկրի շենացման ուղղությամբ և թույլ է տալու երկարաժամկետ առումով նոր պրոյեկտների մասին մտածել ու սկիզբ դնել»,- Արցախի Հանրապետության Ազգային ժողովի վեցերորդ նստաշրջանի եզրափակիչ լիագումար նիստին իր ելույթում ասաց Արցախի Հանրապետության պետնախարար Արայիկ Հարությունյանը:
Անդրադառնալով պատգամավորների արտահայտած որոշ մտահոգությունների, մասնավորապես միջպետական վարկի և պետական համակարգի օպտիմալացման խնդրի վերաբերյալ, պետնախարարը նշեց. «ՀՀ-ից ստացվող միջպետական վարկը ընդամենը մեր բյուջետային հարաբերություններ են, մաքսային և վարկային մեր համատեղ քաղաքականության արդյունքում ձևավորված ֆինանսական ռեսուրսները»:
Ինչ վերաբերում է պետական համակարգի օպտիմալացման խնդրին` Արայիկ Հարությունյանը ներկայացնում է, որ նախագահի հստակ հանձնարարականը կա և հունվարից փուլ առ փուլ նախատեսվում է աշխատանքներ իրականացնել այդ ուղղությամբ: «Դրան զուգահեռ մենք պետք է հասկանանք, կարողանում ենք մեր քաղաքացիներին ապահովել աշխատանքով: Մեր երկրում ձևավորված է բավականին լուրջ ներդրումային դաշտ ստեղծվում են աշխատեղեր, որտեղ կա աշխատուժի խնդիր: Մենք պետք է շատ սահուն կատարենք օպտիմալացումը և կարողանանք մեր կադրերի պատրաստման հարցում ևս լինել ավելի հետամուտ»,- պարզաբանում է պետնախարարը:
Դավիթ ԱԲԱՂՅԱՆ
