Խորհրդարանում վերջապես ավարտվեցին «Ելքի» 20 րոպեանոց ընդմիջումները:
«Ելք» խմբակցության ղեկավար Նիկոլ Փաշինյանը հայտարարեց, որ «այսօրվա մեր գործողություններով ի ցույց դրեցինք, որ ինչպես նախկինում, օրենքի, ժողովրդի շահերի ոտնահարման որեւէ դեպք «Ելք» խմբակցության կողմից անարձագանք չի մնալու»:
«Ելքի» պատգամավոր Արամ Սարգսյանը շնորհակալություն հայտնեց ՀՅԴ-ին՝ իրենց միանալու եւ 20 րոպե ընդմիջում վերցնելու համար: Հ
ՅԴ խմբակցության քարտուղար Աղվան Վարդանյանն էլ հակադարձեց՝ ասելով, որ դա «Ելքի» հետ բացարձակապես կապ չունի:
Իսկ ՀՀԿ պատգամավոր Սամվել Նիկոյանը «Ելքին» զգուշացրեց, որ քանի որ ԱԺ կանոնակարգ օրենքի այդ հնարավորությունը օգտագործեցին ոչ իր նպատակի համար, ԱԺ աշխատանքները խաթարելու նպատակով կիրառեցին, մեծամասնությունը ինչպես այդ հնարավորությունը տվել է, այդպես էլ կվերցնի. «Այն որպես խաղալիք օգտագործեցիք դուք: Նշանակում է՝ մենք ենք տվել ձեզ, քանի որ դուք ի չարս օգտագործեցիք, հավանաբար մենք այդ խաղալիքը կվերցնենք ձեր ձեռքից, դուք դրանով կվնասեք նաեւ ձեզ»:
Իսկ ՀՀԿ պատգամավոր Մարգարիտ Եսայանն ասաց, որ իսկական ժողովրդավարությունը սա է: Նա կասկածներ ունի, որ աստղերը լուրջ ազդեցություն են թողել այսօրվա իրավիճակի համար, քանի որ մի քանի օրից օրերը սկսում են երկարել, այսինքն:
Նիստը եզրափակեց Սեյրան Սարոյանը՝ կոչ անելով, որ արեք չկռվենք. «Դեմներս Նոր տարի ա, հիմա ով ինչ արեց՝ արեց: Նիկոլ ջան, ապրես, շուտվանից էսքան իրար չէինք տեսել: Մեր գործը մինչեւ ժամը 6-ն ա, ինչի՞ ենք կռվում, չգիտենք: Արեք սաղս իրար ուրախ Նոր տարի մաղթենք, ժողովրդին մաղթենք, ով ինչով կարա ժողովրդին օգնի, որ ուրախ Նոր տարի ըլնի, ում ձեռ ինչ կա՝ բաժնեք ժողովրդին, որ մենակ բուդը չուտեք: Թե չէ լավ չի լինի, կառտոլով Նոր տարի չենք անելու»: Նա կոչ արեց, որ ամեն պատգամավոր իր ընտրատարածքում հասարակությանը, բնակչությանը օգնի. «Արեք շուն ու կատվի նման չբաժանվենք իրարից, արեք ուրախ տոնայնությամբ էլ բաժանվենք: Մեկ ա, մեր խոսքն անցավ, մեծամասնություն իրա գործն արեց, ընդդիմությունն էլ իրա գործն արեց»:
Այս նստաշրջանը հայտարարեց փակված:
Հռիփսիմե ՋԵԲԵՋՅԱՆ
