Կաշառք պահանջելու եւ ստանալու մեջ մեղադրվող նախկին դատավոր Իշխան Բարսեղյանի համար այսօր Շենգավիթ վարչական շրջանի ընդհանուր իրավասության կանչով դատարան կրկին շտապօգնություն եկավ:
Ամբաստանյալը դատական նիստի սկզբում դատարանին հայտնեց, որ քրեակատարողական հիմնարկից եկել է վատ ինքնազգացողությամբ ու արյան բարձր ճնշմամբ, ունի սրտխառնոց: «Շտապօգնության» անձնակազմը նախկին դատավորի վիճակը գնահատեց բավարար ու դատարանին հայտնեց, որ չնայած նա արյան բարձր ճնշում ուներ, բայց ստացել է համապատասխան դեղորայք ու ի վիճակի է մասնակցել նիստին:
Նիստը, դատարանի որոշմամբ, շարունակվում է: Իշխան Բարսեղյանը նաեւ դատարանին հայտնեց, որ ուղեկցող ոստիկաններն այսօր իր փաստաբաններին թույլ չեն տվել դատարանում կալանավորների համար հատկացված խցում հանդիպել իր հետ: Դատարանը պարզաբանեց, որ այդ տարածք պաշտպաններն իրավունք չունեն մուտք գործել:
Հիշեցնենք, որ Իշխան Բարսեղյանին մեղադրանք է առաջադրվել, որ նա 1999 թվականից զբաղեցնելով Երևան քաղաքի Շենգավիթ վարչական շրջանի ընդհանուր իրավասության դատարանի դատավորի պաշտոնը, հանդիսանալով դատական իշխանության մարմնի ղեկավար աշխատող և մշտապես իշխանության ներկայացուցչի գործառույթներ իրականացնող պաշտոնատար անձ՝ Նորիկ Հակոբյանի օգտին իր լիազորությունների շրջանակում գործողություններ կատարելու համար նրանից միջնորդի միջոցով պահանջել և անձամբ ստացել է խոշոր չափերով կաշառք:
Արփինե ՍԻՄՈՆՅԱՆ
