ԱԺ-ում լարված մթնոլորտ է, «Ելքը» շարունակում է ամեն օրենսդրական նախաձեռնության քվեարկությունից առաջ ԱԺ կանոնակարգ օրենքի 63 –րդ հոդվածի 3-րդ մասից օգտվելով՝ վերցնել 20 րոպե ընդմիջում:
ՀՀԿ-ականներն արդեն բորբոքված են եւ չեն ուզում 20 րոպեն մեկ գնալ-գալ: ԱԺ նախագահ Արա Բաբլոյանն աշխատում է որքան հնարավոր է արագ կարդալ օրենքի անունն ու հայտարարել քվեարկություն, որ Փաշինյանը չհասցնի վարման կարգի վերաբերյալ ձայնի իրավունք վերցնել ու ընդմիջում ասել: Պարոն Բաբլոյանը կոչ արեց մեկը մյուսին հարգել. «Մենք համբերատար աշխատել ենք եւ թողեք աշխատենք»:
ԱԺ փոխնախագահ Էդուարդ Շարմազանովն ասաց. «Աժիոտաժ սարքել պետք չի: Ինչքան դուք ունեք իրավունք վարման կարգով խոսելու, այնքան էլ կոալիցիան ունի: Կներեք, ԱԺ նախագահությունն էլ նենց Սադի գոքորները չեն, որ դուք ոնց ուզեք՝ անեք: Կա օրենք: Խնդրում եմ ԱԺ նախագահին օրենքով սահմանված կարգով հարցն անել: Որոշումն ընդունվել է, դահլիճում կա 63 հոգի, խնդրում եմ պրովոկացիաների չտրվել, հո չենք եկել…ինչ ա, մանկապարտե՞զ ա»:
Նիկոլ Փաշինյանն արձագանքեց. «Տեսեք ինչ է կատարվում, ԱԺ փոխնախագահը ԱԺ նախագահի հասցեին ասում է՝ հո Սադի Գոքորը չի, արա, էս ինչո՞վ եք զբաղված»:
Դահլիճում աղմուկ բարձրացավ՝ Շարմազանովը սկսեց բղավել. «Ես ե՞րբ եմ տենց բան ասել»: Պատգամավորները հերթական անգամ ընդմիջման գնացին՝ 20 րոպեով:
Հռիփսիմե ՋԵԲԵՋՅԱՆ
